Gobierno di Aruba a anuncia cu presupuesto 2020 mester wordo trata y aproba entrante e siman aki pa asina por implementa e pakete social di ayudo.
Prome Minister, Evelyn Wever-Croes a haci un apelacion no solamente na tur parlamentario; sino na tur partido politico pa nan para hunto pa pais Aruba tin su presupuesto 2020 aproba lo mas lihe posibel.
El a cualifica e presupuesto 2020 como uno den tempo di crisis, sin e medidanan di reforma fiscal. Pues e prome mandatario no por imagina cu por tin politiconan y parlamentarionan cu por tin algo contra e presupuesto aki. “E no ta un presupuesto regular, e ta un presupuesto di crisis,” el a bisa.
E presupuesto aki ta esencial tambe pa pais Aruba via Hulanda por tin acceso na cierto fondo di ayudo Europeo pa confronta e crisis di coronavirus. Specialmente pa duna alivio na e trahadonan y empresanan cu ta wordo afecta actualmente. Ya caba gobierno a introduci e prome fase di registracion pa aplica riba e fondo social di emergencia.
“Esaki ta e momento cu nos mester demostra na pueblo di Aruba cu nos por uni den bienestar di esunnan cu mas seriamente ta wordo afecta,” el a bisa.
E ta un presupuesto 2020 cu su gastonan a wordo reahusta, mirando e situacion di crisis producto di e coronavirus cu nos ta pasando aden, y cu a bira un golpi duro pa nos principal sector economico y fuente di entrada di nos pais, cu ta turismo. Mientras cu e reforma fiscal cu e pakete di medida cu gobierno a traha riba dje pa por cera e presupuesto 2020, a keda completamente afo.
