Dialuna mainta Parlamento di Aruba a tene un reunion publico durante cual a tuma luga tratamento di e presupuesto supletorio di 2024. Durante e tratamento ministernan demisionario presente a contesta preguntanan di parlamentarionan presente relaciona cu e presupuesto supletorio.

Minister Dangui Oduber a contesta pregunta relaciona ministerio di Enseñansa, cartera cu el a tuma over despues di retiro di ex minister Endy Croes. Contestando pregunta tocante e kentallen registratie systeem den cuadro di Landspakket, el a splica cu esaki ta un di e temanan importante cu a ser discuti den cuadro di Landspakket y uno importante pa desaroyo di enseñansa.

El a sigui splica cu e sistema aki ta un proyecto grandi cu duracion di cuater aña y lo revisa e sistema di colecta, analisa y distribui data den enseñansa. Cu e data aki gobierno lo por determina e maneho pa futuro di enseñansa.

El a indica cu e data aki lo ser comparti cu directivanan di scol, inspeccion di enseñansa y departamento di enseñansa, y comunidad tambe lo tin acceso na e data aki. E beneficio di e sistema aki, el a señala, ta cu e data lo ta disponibel pa tur actor den sector di educacion cual na e momento aki no ta e caso. Pa aña 2027-2028 e proyecto aki lo ser entrega.

Minister Geoffrey Wever a contesta varios pregunta relaciona na algun cambio den loke ta ministerio di Economia. Un di e preguntanan tabata tocante e cambio den e vestigingsverodening bedrijven, cual ta e ley cu ta regula e dunamento di permiso pa negoshi.

E mandatario a splica cu e e ley aki merece un modernisacion y mester bin cambionan den esaki. El a resalta cu mirando e presion cu tin riba departamento di Asuntonan Huridico e ta un proyecto cu gobierno a hinca den Landspakket y Hulanda a dicidi di yuda cu modernisacion di e ley aki.

El a agrega cu na varios ocasion el a vocifera cu e constelacion di Landspakket ta algo positivo pa Aruba pasobra e ta dua acceso na fondonan, acceso na expertonan pa yuda caminda Aruba su capacidad ta limita. Cu esaki, el a indica, ta acelera e cambionan cu pais Aruba mester.

Otro cambio cu el a menciona ta trata e proyecto onderzoek commerciele kasteelt den sector di agricultura. Minister Wever a splica cu na maart ultimo el a bay Hulanda pa un investment summit y a bishita varios instancia cu conocemento den e area aki pa purba busca mas sincronisacion riba e desaroyo di e sector di agricultura comercial y innovativo na Aruba.

El a sigui splica cu despues di informa Hulanda kico ta Aruba su intencion a organisa un destaho publico caminda cu a pidi pa e institutonan aki yuda Aruba den e desaroyo di e sector aki. Cu e proyecto Hulanda ta investiga con por desaroya agricultura comercial innovativo.

Segun e mandatario e trabou aki ta den desaroyo, expertonan ta na Aruba y ta haciendo nan investigacion y na januari mester keda cla. Cu esaki, el a resalta, ta crea e base con pa realmente desaroya agricultura inovativo na Aruba y traha realmente riba diversificacion di economia y oportunidadnan nobo.

Otro topico cu a bin dilanti ta trata e overdraft pa Freezone cu ta inclui den e presupuesto supletorio. Minister Wever a splica cu un di e problemanan cu Freezone tin ta un discusion cu e compania tin cu e compania di pensioen pa empleadonan. El a subraya cu esaki ta un situacion cu el enkontra ora el a bira minister y no ta un situacion cu a nace durante e tempo cu e ta minister.

El a splica cu tabatin diferente investigacion cu a tuma luga pa sigura cu e calculacion di e pensioenverplicht adicional aki ta conforme ley. El a indica cu na final di dia a desaroya un plan pa restructura Freezone, a bin cu un hunta di supervision nobo, a haci cambio na e directiva y cual ta puntonan cu mester a aborda pa por percura cu e finanzas di empresa ta back na unda e mester ta.

El a menciona cu riba conseho di e Raad a dicidi cu mester cumpli cu esaki pa e empleadonan por tin nan pensioen manera debe ser. El a enfatisa cu e pa e motibo ey ta necesario pa e presupuesto supletorio ser aproba pa Freezone por haya e fondonan adicional aki pa por cumpli cu e compania di seguro.

Minister Ursell Arends tambe a contesta algun pregunta dirigi a su persona. Un di e preguntanan aki tabata relaciona na e tema di bienestar animal, specificamente kico tabay pasa cu esaki.

E mandatario a splica cu ora el a bira minister el a enkontra cu anualmente Aruba tabata pone mas di cinco mil cacho drumi pa aña, cual tabata unproblema grandi cu ta afecta sociedad y alabes tabata depende di turista pa adopta animalnan.

El a indica cu e cambio di maneho cu a tuma luga, den ultimo dos aña a pone 36 cacho so drumi. El a sigui splica cu a crea un colaboracion cu tur e fundacionnan, pero na mesun momento mester tene cuenta cu e factornan externo cu ta afecta esaki.

Minister Arends a splica cu den e presupuesto supletorio tin 1.4 miyon florin aloca pa e Animal Wellfare Center cu ya caba a ser anuncia y cu ta programa pa habri su portanan na final di 2025.

E centro aki lo atende cu e problema di cacho y pushi riba caya y tambe ta bay ta un centro caminda por brinda informacion na ciudadanonan tocante con pa atende cu nan mascotanan. El a agrega cu a logra cera aliansa internacional pa loke ta trata e tema di bienetsar di animal cu e organisacion Luck for Paws di Merca cu lo brinda cuminda pa cacho y pushi cu lo ta specialmente pa esnan di menos recurso.

El a indica cu na prome instante e tabata den parlamento a anuncia cu e Animal Wellfare Center tabata pa ekipa un total di 80 cacho y 40 pushi pero mirando e fondonan y con esaki ta bay ser desaroya e ta bay ta ekipa pa un total di 60 cacho y 40 pushi.

E mandatario a remarca cu mester sigui empodera e fundacionnan mirando cu nan tin e conocemento tocante con pa atende cu e problema di cacho y pushi riba caya y na mesun momento e concepto di ley cu tin pendiente lo sigui garantisa cu e bestianan ta ser respeta.

Otro pregunta cu e mandatario a ricibi tabata kico lo por ser para cu e cambio di gobierno. Contestando e pregunta aki minister Arends a enfatisa cu tin cuatro concepto di ley cu su persona“kier mira haya luz di dia” y despues cu nan pasa e proceso formal nan por bira realidad mirando cu lo beneficia comunidad.

E leynan ta: e ley di bienestar di animal; ley di corporate governance; ley di maritiem beheer; y concepto di ley di derecho di naturalesa.

Pa loke ta e proyectonan cu e kier mira cu lo ser realisa of termina el a menciona: e proyecto di recapping dump di Parkietenbos; proyecto pasadia, cual el a splica cu tin 1.8 miyon florin aloca pa 10 pasadia habri rond di Aruba, aworaki tin cuater activo y ta spera cu cumpli cu apertura di e resto; y e proyecto plan di adaptacion pa loke ta trata cambio climatico.