Departamento di Salud Publico a nota un aumento, no solamente na Aruba, pero den region e practica di tratamento estetico y di dokter ilegal y ta haci un yamada na comunidad pa no participa na sorto di tratamento asina. Dr. Wilmer Salazar a splica cu tin hende ta acudi na Departamento di Salud Publico buscando un alivio of solucion pa lesionnan cu nan a keda cun’e a consecuencia di un tratamento estetico ilegal y hopi biaha no tin forma pa bira bek of remedia e daño haci. El a subraya cu e miho forma pa preveni y evita un incidente cu por hasta resulta den bo morto, ta pa no participa na tratamento estetico ni tratamento medico ilegal.
Dr. Salazar a subraya tambe cu ta importante pa ciudadanonan contribui na e medidanan preventivo. Tuma contacto cu Departamento di Salud Publico y comparti detayenan tocante e sorto di tratamento aki si y ora bo wordo acerca cu un of otro oferta pa un cita, el a urgi.
Lamentablemente Aruba no a keda liber di e practicanan ilegal aki y ta basta caso tin di personanan local cu ta invita hendenan di exterior pa bin duna tratamento na Aruba, sea na un cas of na hotel mes. Esun cu ta provee e tratamento hopi biaha ta traha cu y administra substancianan prohibi, incluyendo biopolimero y kimiconan cu ta wordo inyecta den e curpa sea pa “kima vet” of pa aumenta cierto areanan manera e chanchan of e lipnan. E practicanan ilegal por resulta den infeccionnan bacterial resistente na tur tratamento y por tin como consecuencia deformacion permanente y hasta morto, cual lamentablemente a yega di pasa na Aruba tambe.
Dr. Salazar a splica cu tur tipo di tratamento estetico ta wordo ofreci, incluyendo drechamento di lip y wowo, inyeccionnan di Botox, uzo di polimero pa aumenta of kita vet den chanchan, tratamento cu kimiconan pa desintegra vet. Esaki ta un nota di alerta serio. E falta di higiena y condicionnan sanitario special no ta existente den un cas of hotel y e persona cu ta administra e tratamento nan no ta registra, ni certifica pa Departamento di Salud Publico. No tin ningun garantia di calidad di trabao.
Departamento di Salud Publico por actua miho contra e situacionnan aki cu ta peligroso si comunidad duna un man y raporta nan. Yudando salubridad publico cu e informacion aki, bo ta yuda preveni situacionnan peligroso pa e comunidad en general. Sea consciente y no participa na practicanan cu por causa daño permanente na bida di hende y hasta morto.
