Ayera mainta den Parlamento di Aruba a tuma luga e tratamento di presupuesto di Tourism Product Enhancement Fund (TPEF) pa aña 2024 na unda Minister di Turismo y Salud Publico, Dangui Oduber, a contesta pregunta di parlamentarionan y a toca diferente punto pa loke ta trata e topico aki.
Manera ta conoci e tratamento di e presupuesto di TPEF mester a luga algun siman atras, pero pa motibo cu oposicion no a presenta den sala di Parlamento, no tabatin e cantidad minimo di parlamentario necesario pa por hiba un reunion publico.
Minister Oduber a inicia constanto diferente pregunta, entre otro pregunta ariba e entradanan di TPEF pa 2024. El a splica e entrada di TPEF pa e aña aki ta na 3.8 miyon florin. Den comparacion cu otro presupuestonan, e aña aki tin un aumento y esaki, el a indica, ta debi na e reforma fiscal cu a wordo introduci, locual a conduci cu e fondo di TPEF tambe a haya un tiki mas entrada.
El a señala cu si compara e presupuesto di aña 2024 cu presupuesto di aña 2022, por wak cu tabatin un aumento di casi 700 mil florin di entrada extra. E entrada extra aki a wordo dirigi pa e inversionnan cu ta wordo haci den e diferente proyectonan, entre otro Boardwalk Malmok y e proyecto di Aruba Amenities.
E mandatario a remarca cu como Ministerio tin un gran cantidad di proyectonan di mehoracion di producto Aruba cu ta forma parti di e vision cu nan ta hibando conhuntamente cu ATA y TPEF, cu ta pone fondonan disponibel pa haci tur e inversionnan necesario pa e proyectonan. Tin varios proyecto cu ya caba a wordo entrega, tin cu ta den construccion y tin algun cu mester cuminsa ainda.
Riba peticion di parlamentario Kamperveen, Minister Oduber a elabora ariba e lista di proyectonan cu a wordo entrega, cu ta andando y cu mester cuminsa.
El a splica cu tabatin e proyecto di Hooiberg fase uno, cual tabata inclui e renobacion di e trapinan di Hooiberg. E di dos fase di e proyecto aki lo bira e creacion di un atraccion turistico na Hooiberg.
E proyecto na Mangel Halto a inclui e renobacion di e palapanan cu algun ciudadano a vandalisa y a kima. Pa drecha esaki, el a indica, mester a haci inversion di algun cien mil florin pa pone palapanan nobo. Aworaki ta bay sigui cu e di dos fase na Mangel Halto cual ta pa organisa henter e area aki miho.
El a sigui splica cu na area di Boardwalk Malmok ya caba e prome dos fasenan di e proyecto aki a wordo entrega y aworaki nan ta bezig cu e di tres y cuater fase. El a remarca cu e deseo ta pa final di 2025 keda cla cu full e proyecto aki cual ta conecta e caminda di Radisson Blu te cu Fisherman’s Hut, cu actualmente no ta e caso.
Otro proyecto cu ta andando cu e mandatario a trece pa dilanti ta e embeyecemento di Eagle Beach Strip. Esaki ta un proyecto cu ta cuminsa desde e rotonde di e hotel Amsterdam Manor y ta termina na e rotonde di Alhambra Mall. E meta di e proyecto aki, el splica, ta pa crea uniformidad na henter e area aki, percura pa tin acera pa turista- y localnan por cana trankil y percura pa embeyece henter e caminda aki.
E proyecto aki ta reparti den seis parcela y ya caba e prome cuater parcela ta andando caba y e otro dos parcela, segun el a indica, mester cuminsa cana e aña aki.
Otro proyecto cu ta andando, y cu ta relaciona na e daño cu UTV’s y ATV’s ta causa na naturalesa, ta e proyecto di un “Mountain Bike Trail.” Minister Oduber a splica cu algun aña pasa a cuminsa pensa ariba e cambio pa crea otro atraccionnan pa asina evita e daño cu UTV’s y ATV’s ta causa na naturalesa.
Asina a pensa pa bin cu un caminda bais, “Mountain Bike Trail”, pa ofrece esaki como un atraccion nobo na e turistanan en bes di haci uso di UTV’s y ATVS. El a agrega cu e caminda no ta completamente cla ainda, e ta den ehecucion y falta dos fase pa termina y entrega e proyecto.
E masterplan di Sero Colorado ta un proyecto cu gobierno tin varios aña den planning, den ehecucion. E status actual di e masterplan di Sero Colorado ta cu ya caba a entrega fase dos di e proyecto di Baby Beach. E proyecto aki mes a wordo dividi den tres fase y aworaki e ta den su ultimo fase cu ta encera e renobacion y mehoracion di e canchanan di tennis y construccion di un restaurant, cual segun el a indica, lo mester cuminsa pa e di dos kwartaal di e aña aki.
Pa loke ta trata e kiosconan cu tabatin intencion di construi, el a informa cu esaki no ta continua mas. El a splica cu durante e destaho publico, e companianan cu a participa a bid dos biaha e suma cu a wordo presupuesta of cu gobierno a pensa cu e kiosconan aki lo por a costa. Esaki a pone cu no tabatin e fondo pa construi e dos kiosconan aki y e ora a cancela e parti aki di e proyecto.
El a sigui splica cu banda di esaki parti di e masterplan ta inclui e proyecto di mehoracion di infrastructura y embeyecemento na Rodgers Beach na unda ta bay move e caminda pa crea mas espacio riba beach, ta bay bin cu parkeo nobo y palapas, entre otro.
El a indica cu pa e proyecto aki ya caba e destaho publico y e gunning a tuma luga y aworaki e contratista cu a gana e destaho publico mester ta preparando e proyecto aki pa cuminsa.
Otro proyecto cu e mandatario a menciona ta e proyecto di Alto Vista. E meta di e proyecto aki ta pa crea un miho maneho di bishitantenan y crea un espacio di paz y trankilidad pa e usuarionan.
El a indica cu ta bay percura pa move tur e desordo cu tin dilanti e kapel na unda tin bendemento di souvenir, cuminda y bebida, y tambe tocamento di musica mas leu y nan ta bay organisa e area pa esnan cu ta haci uso di e kapel, por haci uso di esaki trankilamente. E proyecto aki tambe ta bay cuminsa e aña aki.
Otro proyecto cu a wordo anuncia pa gobierno pa crea atraccion nobo y un spin off economico den diferente districto di Aruba ta e proyecto di anker na Cas Ariba. Minister Oduber a splica cu ya caba a entrega fase uno di e proyecto aki y fase dos inclui crea un atraccion nobo den centro di Santa Cruz.
Un di e proyectonan mas grandi cu den ehecucion ta e proyecto di Gateway 2030 cual ta e ampliacion y renobacion di Aeropuerto Internacional Reina Beatrix. El a splica cu e prome fase di e proyecto aki, fase 1A, lo mester ta kedando cla e aña aki y na mesun momento e planificacionnan pa e siguiente fase, 1B, tambe ta kedando cla pa asina cu fase 1A termina, por cuminsa cu fase 1B.
Tambe tin proyecto di Welcome Festival Plaza cual ta bay ta na e rotonde pafo di Aruba Ports Authority na unda ta bay crea un festival plaza pa tanto local y turista por haci uso di e plaza aki y ta bay combina esaki cu un reconocemento di musiconan local.
Por ultimo el a menciona e proyecto di compra y renobacion di ex edificio di DOW. El a informa cu ya caba APA a cumpra e edificio aki, cual lo bira un combinacion di oficina di Aruba Ports Authority y un Visitor Information Center cu ta bay ser maneha pa ATA na unda turistanan por yega y haya informacion di kico tur nan por haci durante nan estadia na Aruba.
