Ayera mainta a inicia tratamento den Parlamento di e proyecto di cambio di ley di Serlimar, cu a dura te anochi laat, cu consecuencia cu e segundo tanda a keda posponi. Segun un notificacion oficial cu a yega na nos redaccion ayera nochi, secretariado di Parlamento, na nomber di Parlamento, a notifica cu e reunion ta keda posponi te proximo aviso. Esaki ta duna di comprende cu e tratamento lo no sigui awe, loke tabata di anticipa.

Esaki ta indicacion tambe cu e cantidad di pregunta cu a keda, no solamente cerca oposicion sino tambe cerca algun representante di fraccionnan cu ta sostene gobierno, ta rekeri aparentemente mas tempo pa contesta debidamente.

Na inicio di e reunion un grupo grandi di empleado di EcoTech/EcoGas a yega na edificio di Staten pa demostra nan preocupacion pa e cambio di ley, cu den nan opinion ta un menasa pa nan empleo.

E reunion a cuminsa cu presentacion cu un Nota di Cambio di e mandatario, unda a haci algun cambio cu por mira como concesion na e varios criticonan. Esun mas resaltante ta e cambio cu a bin den e reparticion di e cobransa pa recoge desperdicio, cu tabata stipula na Afl. 7,50 cu a bira awor Afl. 15, – mientras cu e ‘afvalheffing’ pa procesa desperdicio a bira Afl. 120,-. En total esaki ta keda na e mesun Afl. 300,- cu tabata planifica anteriormente. E suma nobo pa recoge desperdicio ta un indicacion di duna oido na e critica cu nunca por duna e servicio di recoge desperdicio pa Afl. 7,50, dunando bida na e sospecho cu despues lo subsidia Serlimar pa por maneha e tarea aki.

Un di e otro cambionan tabata cu e mandatario y su conseheronan a tuma e ocasion pa defini mas exacto kico ta ‘afval’ (desperdicio) y kico ta ‘beheer van afval’ (maneho di desperdicio). Den e debate a bin dilanti na varios momento cu e ley aki (di Serlimar) no tin absolutamente nada di haci cu e ‘insinerado’. Esey ta un poco ‘wega di palabra’ si por constata cu den e Nota di Cambio den e definicion di ‘afvalbeheer’ cu ta encera varios punto, bao punto c ta bisa: “het in ontvangstnemen van afval dat bestemd is om in een grote, gesloten verbrandingsoven te worden verbrand.” Segun nos humilde opinion esey na bon Ingles yama un ‘insinerado’.

En todo caso e posponemento te dia 15 di october ta indicacion cu despues di henter un dia di debate, aparentemente e mandatario ainda no ta sigur di tin e votonan. Ta comprende cu lo bin posiblemente un siguiente Nota di Cambio.