Ginecologo na Aruba lo keda duna pashentnan pildo di fertilidad. Segun ginecologo Frank Ho-Kang-You, cu ta den e comision oficial lanta pa combati Zika, nan a tuma e decision aki. Pues ginecologo no ta nenga ‘tratamento’ di fertilidad na hende muhe cu kier sali na estado awor.
Siman pasa Bon Dia Aruba a publica e noticia cu e specialistanan a tuma medidanan di prevencion contra e riesgonan di Zika, cu probablemente ta causa malesanan celebral grave manera microcefalia. Asina cu personanan plania pa sigui tratamento di fertilidad mester warda un rato. Hasta e ginecologonan a dicidi di stop cu e tratamento.
E articulo ta basa riba informacion di un pashent y ginecologo Wout Huisman. Pero awor a sali cla cu tabatin un discusion entre e ginecologonan riba e topico aki y finalmente nan a dicidi cu no por nenga pashent e tratamento. Esaki tambe ta e punto oficial, sr. Ho-Kang-You ta splica, cu e comision di prevencion di Zika lo comunica.
E comision a keda lanta pa wak ki medidanan di prevencion ta necesario contra Zika. Tin diferente specialista den e comision, banda di representantenan di gobierno (Departamento di Salud), AZV, Hospital, laboratorio, etc. Sr. Ho-Kang-You ta encarga cu e Zika-protocol pa hende muhe na estado. “Esaki ta casi cla y lo anuncia pronto.”
Den cuadro di e protocol aki, e topico di tratamento di fertilidad a keda discuti tambe. Aunke e ginecologo kier splica cu na Aruba no tin tratamento avansa manera IVF. “E unico cos cu tin ta pildo pa stimula e fertilidad di hende muhe. Esaki nos lo keda duna.”
AZV ta cubri e pildonan aki pero otro tratamento pashentnan mes mester paga. Mayoria ta bay Colombia pa e tratamento. Nan ta hopi caro sr. Ho-Kang-You ta sigui splica. “Aruba ta mucho chikito tambe pa cuminsa ofrece nan. No tin hopi pashent, mi ta kere anualmente no mas cu 4 pa 5 pashent.”
