Tratamento di apelacion di caso Avestruz a continua den corte ayera mianta na unda e comerciante Pieter Sussebeek, como tambe e sospechoso principal, ex minister y actual parlamentario Benny Sevinger, a presenta na corte pa interogacion.
Segun e noticiero local, Noticia Cla ta indica, un di e huesnan cu ta tratando e caso a interoga Sussebeek y Sevinger, pa mas di dos ora, ariba nan relacion cu otro, tanto nan relacion personal como nan relacion laboral.
E hues a cuminsa recordando e sospechoso Sussebeek cu e ta wordo acusa di cumpra Sevinger tempo cu e tabata minister na cambio di fabor den forma di otorgamento di opcion pa tereno erfpacht. Banda di esaki a acusa Sussebeek di labamento di un suma di 1.3 miyon florin.
E portal ta sigui indica cu e hues e establece e tipo di relacion entre e dos sospechosonan aki y con nan relacion por a influencia y resulta den e actonan castigabel. MAnera tabata e caso durante tratamento di e prome, a keda estableci cu Sussebeek ta un amigo bieu di Sevinger y cu na momento cu Sevinger a bira minister, a pidi Sussebeek pa traha pa Sevinger como consehero.
Hues a enfoca ariba tres regalo en particular, cu segun Ministerio Publica ta señala, Sussebeek a cumpra cu su placa y a duna Sevinger como regalo, cu ta un hekwerk, mashin di gym y un sistema di irigacion.
Segun e noticiero, despues di trata e parti di e regalonan, hues a pasa over na e fabornan cu Sevinger a duna back, a cambio di e regalonan aki.
Hues a repasa e cantidad di traspaso di opcion di tereno erfpacht cu Sussebeek a haya via varios di su companianan y tur e traspasonan ako a sucede tempo cu Sevinger tabata minister di Infrastructura di 2009 pa 2017.
Hues a repasa tambe cu Sussebeek a haya por lo menos opcion pa 7 tereno, mas uno cu un ruman di dje lo a haya opcion pe tambe, pero na final no a haya e tereno, y tambe, segun e portal, el a haya tres opcion mas di tereno via di su mama. Den total Sussebeek a haya opcion pa 11 tereno a traves di su companianan.
