Dialuna a habri cu yen di expectativa pa loke lo bira e reunion di codigo civil cu mester wordo trata. Ora cu a tuma nota di un Parlamento practicamente bashi, e Presidente Marisol Lopez – Tromp a anuncia cu lo pospone esaki como no tin quorum. Fraccion di AVP no tabata presente y tampoco Sra. Desiree de Sousa – Croes kende a bisa cu ya desde diabierna e mayoria a pidi mas tempo.
E no ta asina cu AVP a keda sin ‘show up’ sin mas, ta asina cu tabatin un peticion di diabierna caba, di colega Sr. Bikker hunto cu MEP cu a pidi pa mas tempo pa nan traha riba un posibel contra proposicion riba mi amienda, cual ta algo positivo y p’esey mi ta duna nan e espacio pa duna mas tempo. Mi mes a papia cu esunnan di e comunidad LGBT y splica nan e pakico y mi tabata tene reunion e ora ey cu nan hustamente ora cu e reunion a cuminsa, Sra. De Sousa Croes a splica. Mi a compronde prome cu e reunion a cuminsa cu esaki ya no por a bay pa motibo como cu nan a pidi cancelacion, ministernan, conseho di minister tambe, pues algo cu mayoria hende a pidi pa cancelacion.
“Pa mi, mi kier a sigui. Mi no tabata presente pasobra mi sa cu mayoria a pidi cancelacion, kiermen mayoria lo no ta presente y e ora e reunion lo no por bay door normalmente.”
E presidente di Parlamento a tuma e momento pa splica un ke otro y eynan a confirma cu berdad mayoria tabata kier mas tempo pa traha riba un contra proposicion cu ainda no ta cla. “Mi ta kere den total e ta hopi bon, tur hende ta tuma e tema hopi na serio y ta algo hopi positivo. 8 di september ta mas o menos 10 dia extra y mi ta kere cu e lo no ta un problema, si mi sa cu lo bin algo hopi positivo.” Segun Sra. De Sousa e mes a spera un cancelacion mas cortico, pero a wordo duna te dia 8 y ta spera cu ta keda cla si dia 8 (awo si ta hopi tempo duna na tur hende).
El a bisa: “Ami ta cla for di prome dia, mi amienda ta riba mesa y si bin cu un contra proposicion cu mi ta sinti cu nos no tin mes tanto derecho mi lo pidi pa vota riba e amienda di tur manera”.
Mas tema pa trata
Sr. Bikker cu sinembargo tabata presente a pesar di a pidi pa mas tempo. El a bisa cu e topico di e amienda ta un parti y cu tin hopi mas cos cu mester wordo trata. P’esey lo tabata bon si ministernan tabata presente pa cuminsa contesta esakinan. Manera e proteccion di herederonan y ta lamenta cu nan no a presenta.
Reunion Codigo Civil
Presidente di Parlamento a duna apertura na e reunion manera ta planifica den kalender cu lo a continua el a sigui bisando cu ta constata cu no tin mayoria den e sala, y cu mester tin 11 Parlamentario por lo menos den sala, pa por continua cu e reunion publico. “E dos ministernan cu lo mester tabata t’ey presente pa contesta pregunta, Minister Dowers y Minister Croes, no por ta presente. Asina a pasa riba e lista di presencia pa mira ken t’ey y ken no t’ey, 8 so tabata presente. Y consecuentemente a pospone e reunion pa dia 8 di september.
Sra. Lopez – Tromp a bisa cu el a ricibi carta di Sr. Bikker cu a pidi den nomber di su fraccion y otro fraccion pa mas tempo. Tambe Minister Dowers a bisa cu e ta sostene pensamento di mayoria Parlamentario pa duna mas tempo pa caba algun trabounan y adaptacionnan di e ley prome cu continua cu esaki. Sr. Bikker a confirma e peticion pa pospone e reunion cu 1 siman.
Sra. Evelyn Wever – Croes a expresa su opinion riba e echo cu Prome Minister no ta duna cara na e topico y cu awo ministernan no por a bin e reunion y ta considera esaki un falta di respet. El a sigui splica cu MEP tambe a sinta cu Sr. Bikker prome cu el a manda e carta y cu a bay di acuerdo pa pospone e reunion. Ya desde siman pasa a mustra unda nan ta para y cu gobierno mester regla e cuestion di e amienda den ley. Ta pidi si cu e keda te na e fecha aki y cu hende presenta y si por exigi pa Prome Minister tambe presenta.
