Gobierno y banco AIB a firma e contracto pa asina ex edificio di John F. Kennedyschool na LG Smith Boulevard lo pasa over pa e banco. Nan ta uza e edificio pa finansia e proyecto di renoba y amplia e compleho y huur esaki bek na gobierno. E benta ta encera un suma di 5,8 miyon florin.

E siguiente informacion ta for di un relato di gobierno.

Manera a keda anuncia, Gabinete Mike Eman a dicidi cue edificio aki lo ta destina pa uso di Departamento di Enseñansa y tur su dependencianan. Di e manera aki ta busca pa alcansa tres obhetivo importante: 1. rescata un edificio di balor historico pa Aruba. 2. reduci e gastonan di huur di edificionan priva. 3. crea un miho coordinacion entre e departamentonan di enseñansa treciendo nan hunto.

Construccion ta den man di Bohama Aruba cu ta dispone di un termino di 18 luna of aña y mey pa completa e trabou. Esaki ta nifica cu pa fin di 2018 e edificio lo ta completamente cla pa e departamento y personal drenta. “Edificio di John F. Kennedyschool ta forma parti importante di historia y educacion tecnico na Aruba”, prome minister Eman ta indica. “Hopi studiante a sigui den ramo tecnico y despues a bira personahe di hopi importancia den mundo industrial y maestronan di e scol tambe ta legendario.” E trabounan lo inicia e luna aki.

Premier Eman a gradici AIB ayera como ‘un socio strategico cu a sa di maneha bon e fondo di FDA pa carga e proceso di renobacion di Aruba hunto cu Gabinete Mike Eman I y II’. Awo AIB Vastgoed  kier ta socio cu Gobierno di Aruba den proyectonan pa futuro, segun e.

Minister Benny Sevinger di Infrastructura  tambe ta splica cu un di e prome stapnan cu a tuma ora a asumi mando tabata inventarisacion di espacio cu Gobierno tabata huur y e espacio disponibel den propiedadnan di Gobierno. A registra mas di 68 mil meter cuadra na huur, mientras cu tabatin casi mesun tanto bashi. E ora ey a bay over na wak cua por a renoba pa asina baha e huur. Esun cu no por a drecha mas, a ponena benta pa comercio tuma over. “Proyecto di JFK ta e renobacion di e scol existente y construccion di un edifiico moderno su tras. E ta budget neutral si mira cuanto ta paga pa luna rond Aruba.”