Trapamento di ley den Hunta di Supervision? Ta importante pa pueblo ta bon informa riba kico ta pasando na Colegio Arubano

Den cuadro cu tur e cambionan tumando luga na Colegio Arubano, maestro di scol Chando Pietersz ta conta Bon Dia cu ta importante pa tin mas transparencia na Colegio Arubano pa aclara tur tipo di rumor cu ta bayendo rond. 

Segun declaracion di sr. Pietersz, si ta berdad cu tin 2 rectornan Hulandes cu tabata gana mas cu tur e otro rectornan cu nos a yega di conoce, esey ta nifica cu ta trapa ley. Esaki ta conta tambe si un persona gana menos. ”Mester bin mas transparencia na Colegio Arubano y na base di e transparencia ey, pueblo y esunnan cu ta interesa den desaroyo di Colegio Arubano por haya sa con e 2 rectornan Hulandes a wordo paga. Mi no ta interesa den sa e suma di salario, mi kier sa si di cua fondonan a paga e 2 personanan aki” , sr. Pietersz ta splica.

Den e forma aki, sr. Pietersz ta sigui splica cu por tira un bista te con leu un of otro minister di enseñansa tabata envolvi, pasobra naturalmente esaki mester tuma luga cu conocemento di e minister. Ta pa e motibo aki den pasado sr. Pietersz ta bisa cu e la puntra te con leu e minister ta na altura di e situacion na Colegio Arubano  y te dia di awe no a haya un contesta.

Pueblo ta merece claridad
”Mi ta kere como pueblo nos merece haya un tiki mas informacion, pasobra nos no mester lubida cu ora nos ta papia di un scol, nos ta papiando di un organisacion cu ta wordo subsidia door di gobierno. Una bes cu ta wordo subsidia door di gobierno, esaki ta nifica cu tin placa di pueblo envolvi.”, sr.Pietersz ta splica Bon Dia.

E ta sigui agrega cu esaki ta trece cun’e cu naturalmente mester bin claridad ora ta papia  di fondonan cu pueblo ta genera y pueblo ta paga impuesto den moda cu e organisacionnan aki ta sigui drey. Pa e motibo aki segun sr. Pietersz ta di suma importancia pa por sali pafo anto elabora con e relacion entre e rectornan y scol tabata ta den tur aspecto.

Tin falta di trankilidad na Colegio Arubano 
Segun sr. Pietersz, ultimo tempo ora ta papia cu maestronan di Colegio Arubano, bo
ta sinti cu no tin e trankilidad di mente ni trankilidad den forma di grupo cu ta necesario pa duna bon enseñansa. Esaki ta trece cun’e e ora cu tin preocupacionnan basta pisa cerca diferente hende cu ta mas liga cu Colegio Arubano. 

” Enseñansa por florece y e alumnonan por haya probecho di enseñansa si esaki ta tuma luga bao trankilidad.  Esaki ta posibel ora cu un docente ta den un ambiente calma y tambe satisfecho cu nan trabao. E ultimo 2 añanan , papiando cu ex- coleganan mi a ripara cu esaki actualmente no ta e caso” sr. Pietersz ta bisa.
E ta agrega cu esaki ta pone tambe cu nos manera comunidad tin un responsabilidad grandi den esey pasobra ta trata di nos yiunan y hobennan cu mester ainda cuminsa studia pa nan profesion den futuro. ”Si e unico scol na Aruba cu ta brinda HAVO y VWO completo tin cierto disturbio, normalmente e consecuencianan ta hopi grandi” , sr. Pietersz ta sigui bisa. E alumno ta keda central y e alumno por wordo perhudica si no tin un ambiente faborabel y positivo na scol pa  nan por continua cu nan studio.