(LaRepublica) – Dia 23 di september a cuminsa un welga di transporte cu a paralisa e cayanan di Lima y Callao, afectando e trafico na Puente Piedra. E manifestacionnan aki ta debi na extorsion cu diferente empresa di transporte urbano na Lima a bin ta sufri.

E districtonan cu mas a keda afecta pa e ola di violencia aki ta San Juan de Lurigancho, Ancon y Comas caminda ayera diferente compania di transporte a stop nan operacion y a uni na e welga.

Mayoria di e companianan cu a uni na e welga ta sufri extorsion di diferente organisacion criminal cu tur dia ta pidi un cupo pa cada unidad di transporte pa no ataca nan trahadonan. Sinembargo tambe tin companianan di transporte cu no ta sufri e tipo di represalia aki pero pa motibo di solidaridad nan tambe ta suscribi na e manifestacion.

Segun loke a keda indica pa general di Polis Nacional di Peru (PNP), Oscar Arriola, tin 15 compania di transporte urbano cu a informa formalmente na autoridadnan cu nan ta ser extorsiona pa gangnan criminal. Sinembargo, e Gremio di Transportadornan a informa cu tin alrededor di 33 compania cu lo a uni na e welga general ayera 26 di september.

Te cu ayera, Ministerio di Interior a declara cu e lo establece un seguridad mas grandi den intentonan pa desmantela organisacionnan criminal cu a bin ta terorisa companianan y nan chauffeurnan.

Segun Martin Valeriano, presidente di Asociacion Nacional pa Integracion di Transportadornan (Anitra), tabatin 50 compania di transporte cu a uni na e welga di transportadornan pa motibo di extorsion y atakenan riba bida di trahadonan. E companianan di transporte aki di Lima y Callao a mobilisa pa Congreso di Republica pa exigi mayor seguridad pa nan bida y trabou.

Durante e welga inespera di dia 23 di september, Julio Campos, e vice-presidente di Aliansa Nacional di Transportadornan, a indica cu e manifestacion tabata un exito y cu e ta pidi disculpa na e ciudadanonan cu a ser perhudica pa e medida tuma pa e sindicato.

Un di e peticionnan di Campos ta cu autoridadnan di e ciudad por interveni den e problema pa sigura bida di e transportadornan; Sin embargo, representantenan manera Javier Farfan, di e compania ‘La Nueva Estrella’, tin un opinion negativo pa loke ta trata gobierno, declarando cu “nan no ta kere mas” pa loke ta trata su accionnan di seguridad.

Entre e accionnan aki, Minister di Interior, Juan Jose Santivañez, ta destaca e creacion di un grupo special pa combati extorsion na Peru, cu enfasis riba e caso di transportadornan. Sinembargo, lo ta solamente un scuadron di 100 agente policial, segun general Oscar Arriola.