Mas cu 2,1 miyon di ganashi confisca

Hues a dicta den e caso di transaccion bancario ilicito, cu e sospechoso mayor ta haya un total di 30 luna prizon di locual 12 ta condicional. Tambe el a kita mas cu 2,1 miyon di e sospechosonan, hunto cu un propiedad, auto y ainda mas placa cash.

Ayera atardi hues a trata e caso cu 4 sospechoso, tur di descendencia Chines. Nan tabata manda placa chikito y grandi di Aruba pa China principalmente y di Aruba pa Sint Maarten, Colombia, Surinam, Venezuela y Aguila. Es mas, tabata cambia sumanan di placa riba gran escala.

Segun Ministerio Publico, nan a gana comisionnan ilegal cu e transferencianan y e cambiamento di cen. Dos di e sospechosonan tabata inverti e ganashinan aki den entre otro propiedad manera tereno of edificio.

Mirando tur loke a wordo descubri den e caso aki, e dos otro sospechosonan envolvi a haya 18 luna di prizon cual 6 ta condicional. Y e di cuater sospechoso a haya un boet di 10 mil florin pa paga. Tres di nan a bay mes ora bek pa KIA pa completa nan castigo, segun Ministerio Publico.

Placa confisca
Den e caso aki cual su investigacion a dura un aña y mey, ta hopi placa nan a confisca. Despues Ministerio Publico a pidi pa haya esaki y hues a aproba. Den termino huridico esaki ta wordo yama ‘verbeurd verklaard’.

Si hues ta dicidi pa tuma e medida aki ta depende riba kico e material criminal ta. Pues den e caso aki un auto, placa cash y un inversion den propiedad cual pa hues ta algo cu por wordo kita di e criminal, specialmente si ta por medio di crimen e sospechoso a haya esaki.

Cerca e 2 sospechosonan di cual a kita 2,1 miyon cual husticia a confisca, 1,8 miyon ta pa impuesto y e resto pais Aruba ta tuma.

Investigacion di un aña y mey
E caso aki cu tabata envolve actividadnan bancario ilicito a sali na cla den un investigacion anterior di droga, den cual investigadonan a wak con e sospechosonan den e investigacion tabata haci uzo di servicionan di un di e sospechosonan den e caso Hamburg. E sospechoso aki tabata cambia placa pa e sospechosonan den e investigacion di droga of tabata manda cen afo pa nan.

E ora a cuminsa un investigacion contra e sospechoso aki. Recherche Samenwerkingsteam (RST) tabata encarga, bao guia di Ministerio Publico. Esaki a mustra cu dos di e sospechosonan tabata envolvi den actividadnan bancario ilicito extenso y trans-nacional.

Casi tur siman y pa periodo largo tabata manda sumanan di entre 500 dollar pa 100.000 dollar den exterior. Tabata cobra comisionnan di 5%, pero tin biaha te 8%, manera Ministerio Publico a constata. Por medio di esaki e sospecho tabata genera entradanan ilegal den cash hopi grandi. Den cuadro di e investigacion a confisca sumanan den cash grandi durante ristamento di hogar di e sospechosonan. 

Ora tabata paga tercernan, tabata haci pago parcialmente den cash, por locual eventualmente e tercernan tabata deposita e placa bek riba cuentanan bancario di e sospechoso.

Asina tabata aparenta cu e cen tabata wordo presta di e tercernan, mientras cu en realidad, e cen tabata di e sospechosonan mes. E placa cu e sospechosonan tabata gana tabata wordo uza como inversion tambe pa propiedad di activo fiho manera tereno of edificio, cual awo ta cay na beneficio pa pais Aruba.