ORANJESTAD – Un guia ta importante pa personanan cu limitacion ora di bay traha. Lionel Rumnit, kende ta job coach na Trampolin Pa Trabou, ta splica di situacion cu por pasa pa cu e persona cu limitacion.

Tin persona cu ta traha, pero nan tin cierto problema cu edad di adulto pero comportacion di 12 aña.Si un persona e momento cu e ta trahando y cuminsa actua manera mucha, of papia cosnan cu no ta ‘make sense e momento ey’ ta pone stop di traha, asina proteha e cliente tambe pa proteha e luga, pa e no bay malo of perde cliente.

Rumnit ta bisa cu locual ta importante ta pa otronan wak e banda bon. Si e persona ta traha bon, e ta energetico, ‘esey ta locual hende tin cu acepta’. Nan no ta bay pa locual nan ta considera normal. “Pa nan e ta normal pa nan ta den nan mesun mundo, y ken nos ta pa bisa cual ta normal. Kico ta normal?”

Segun Rumnit, e ta un proceso di comprendemento pa un persona cu limitacion. Tambe mester sa con pa papia cu nan. “E problema ta, si bisa algo mucho bruto, e persona ta dal cera. Esey nos no kier tampoco. Si yega na cierto situacion, nan ta pone no activo, pa asina por dedica tempo pa coach, pero e rol di cas ta importante.”

Sinembargo Rumnit ta aclara cu si e situacion na cas no ta relaha, e por afecta. E ta continua bisa cu tin mayor no gusta pa nan yiu bay Trampolin pa ‘motibo cu e nivel ta abou pa nan yiu’, pero e realidad, segun Rumnit, ta cu e mayornan mes no kier haci esfuerso pa hiba e yiu. Si e persona cu limitacion haya trabou, e trabou na Trampolin no ta caba eynan. Nan por combersa cu hende di nan mesun nivel.

Den caso cu persona cu limitacion no ta sali for di cas, e ta consumi su mes riba un otro manera, haci cosnan for di tino. Esey ta importante pa mayornan compronde. E comunicacion ta bira dificil den e parti na cas, mester papia cu mayornan.

Bon Dia Aruba a puntra Rumnit si tin situacion unda cu un dunado di trabou por grita of maltrata un persona cu limitacion, kico por pasa. E ta contesta cu e ta taha nan. “Tin hende cu limitacion trahando, cu ami mes no a pone nan na e trabou. Pues hende a duna nan un chens. E ta algo cu no ta structura, no drecha y no ta coregi.”

Pero di esunnan cu ta cay bou di dje, tin cu tin problema, discusion. Tin algun dunado di trabou cu a yega di haci un cosnan malo, manera no paga, pero Rumnit ta busca otro oportunidad pa su clientenan. E ta laga e doñonan di trabou den man di Dios. “E ta den miho beneficio, tur cos ta pasa pa un rason. E situacion cu no mester pasa, pero ya, cosnan di bida cu por pasa cada cierto tempo, pa nos siña di nan.”

Segun Rumnit, e ta un ehempel di con cos por bay malo. E ta bisa cu ta concentra cu afspraak cu e dunado di trabou, pa esey ta cla pa tene expectativa bou control. E ta agrega cu ta bayendo bon. Rumnit ta bisa cu esey ta necesario, pa asina tur hende tin oportunidad di desaroya nan mes manera persona ya di un edad mas grandi. Pa nan por confronta situacionnan y emocionnan cu por bin den futuro.

Pa locual nan kier logra manera fundacion, Trampolin ta pa sigui crece. Nan idea ta basa riba practica, pero nan ta enfoca pa locual e mercado ta pidi. “Den e parti di limpiesa cu nos por lanta un team di limpiesa. Na Hulanda, mi tabata traha cu compania cu ta haci limpi, cu tur persona aden tin limitacion, anto nan ta competi cu esunnan cu no tin limitacion den otro compania.”

Rumnit kier a pone enfasis cu unabes cu compania ta duna trabou na hende cu limitacion, e ta duna un aporte den comunidad. E personanan aki ta haya oportunidad pa nan por haci algo.

E ta continua splica cu nan por haci limpi, tin e parti di cushinamento, laundry, hendenan cu por dobla paña, strica. E ta bisa cu cosnan asina ta haci cu pa aña, nan fundacion ta sigui crece.

Bon Dia Aruba a puntra Rumnit si e persona cu limitacion a yega di traha den un oficina of algo diferente cu haci limpi. El a contesta cu a yega di haya un persona cu a traha den oficina cu parti Quickbooks, pero e no por a contesta telefon.

Den su caso, e ta splica cu e problema tabata esey. E por traha bon, pero esey ta dificultad. Pero un otro cu si por contesta ta parti e trabou, pa final di dia cera e opdrachten, e ora tur hende ta keda contento. Colega ta aprecia e calidad cu un otro tin, esey ta wordo haci pa traha hunto cu hende. “E ta nace di necesidad con ta bay soluciona e problema, e muhe ta bon den su trabou, no kier sak’e, pues e ta keda bon.”

Rumnit ta bisa cu tin grupo di persona cu limitacion cu por haci mas. E ta remarca cu enfoke mester keda practico, pa asina nan por hinca energia. No solamente teoria, con pa haci cierto cos, pero practica e limpiesa, e higiena y mucho mas. El a finalisa ta bisa cu fundacion Trampolin ta keda pa esunnan cu di berdad kier bay traha.