“Trampolin pa Trabou” a ricibi un donacion di impacto comunitario global di Starbucks Foundation

E donacion ta reconoce e impacto comunitario cu e organisacion tin na Aruba

“Trampolin pa Trabou” a wordo selecciona pa ricibi un donacion di $10,000 como parti di e programa di Beca di Impacto Comunitario Global di Starbucks Foundation. “Trampolin pa Trabou” ta un organisacion “non profit” na Aruba cu ta dedica na yuda personanan cu limitacion pa haya y mantene empleo. Door di train y traha na Trampolin pa Trabou, personanan cu limitacion ta haya experiencia laboral y desaroya nan habilidadnan social y cognitivo, pa despues por forma parti di e sector laboral.

Door di e programa unico aki, Starbucks Aruba a nomina “Trampolin pa Trabou” pa sostene nan proyecto y ofrece entrenamento pa trabou, guia di empleo, y empoderamento pa persona nan cu limitacion. Starbucks Aruba ta orguyoso di por a wordo selecciona como un di e mercadonan pa por yuda na nos comunidad local cu un suma cu sigur lo haci un impacto den desaroyo di un organisacion local, asina Sra. Wanda Broeksema disctrict Manager di Starbucks Aruba a declara.

Ken ta “Trampolin pa Trabou”

“Trampolin pa Trabou” a keda funda na aña 2009 door di Sonrisa, y ta traha pa ofrece oportunidad di empleo na personanan cu limitacion for di edad di 17 aña bay ariba cu ta enfrenta dificultad pa yega na e mercado di trabou debi na varios limitacion. A traves di un programa structura cu ta involucra entrenamento, structura y eventualmente empleo, Trampolin ta ofrece un espacio pa su clientenan por haya experiencia di trabou y desaroya nan habilidad social. E organisacion tambe ta coordina un “self-sustaining” cushina cu ta ofrece servicio di catering na localnan y clientenan priva, asina ta ofrece oportunidad di empleo adicional y oportunidad di desaroyo di habilidad pa su clientenan. E meta di Trampolin ta pa yuda su clientenan cu empresarionan local cu ta balora nan talento unico y potencial.

E donacion aki tabata un regalo inespera alabes “na ora” pa “Trampolin pa Trabou,” como cu nan tabata planificando un proyecto di un “coffee shop” unico pa e aña cu ta bin. E donacion di $10,000 lo ta instrumental pa lansa esaki, y alabes lo emplea diferente personanan cu limitacion.

Starbucks Foundation Global Community Impact Grants

E programa di Becas di Impacto Comunitario Global di Starbucks Foundation ta sostene organisacionnan “non-profit”cu ta eherce programa nan cu ta crea un impacto local of regional significativo, ampliando e ambicion di e compania pa contribui positivamente na nos comunidad.

Desde cu a lansa di e programa na 2022, Starbucks Foundation a reparti mas cu $10 miyon na mas cu 150 organisacion “non-profit” a traves di mas cu 60 mercado.

Desde comienso, Starbucks a destaca y profila su mes como un compania diferente – un cu ta duna prioridad na nan partners (empleadonan), clientenan, y e comunidad cu nan ta sirbi koffie diariamente, asina Brady Brewer, CEO International na Starbucks y miembro di ekipo di The Starbucks Foundation a declara.