Bureau Integriteit (BIA) ayera a inicia e siman di training pa Diensthoofden den cuadro di integridad. E impacto di diensthoofden ta uno sumamente crucial riba personal publico, como ehempel y pa duna guia for di perspectiva di integridad.
Minister di Asunto Economico, Comunicacion y Desaroyo Sostenible, Geoffrey Wever, a bisa cu e tabata presente na e ocasion hunto cu minister presidente, den representacion di minister Ursel Arends di Integridad, Naturalesa y Asuntonan di Adultonan Mayor, kende no por tabata presente. “Nos haci e apertura di e siman di training na e hefenan di departamento (diensthoofden). E un hopi bon iniciativa. E hefenan di departamento tin un impacto grandi riba personal di gobierno. Nan ta esnan cu ta duna ehemplo, nan ta esnan cu ta tur dia, dia aden, dia afo cu empleadonan publico di gobierno, y por duna nan guia y ta señala diferente cosnan cu por tin mester di atencion desde un perspectiva di integridad”, Wever a comenta.
Wever a bisa cu e kere ta un bon idea cu a cuminsa cu e trainingnan aki y ta wak cu tin animo halto bao di e hefenan di departamento cu a participa, agregando cu pa hopi tempo a papia di integridad na Pais Aruba. “Ya integridad a cuminsa bao di gobierno anterior y a continua den e gobierno actual. Minister Arends ta hopi envolvi den e topico aki tambe, y ta contento pa mira cu ta tumando luga na tur nivel di gobierno.”
El a indica cu riba tur tereno, “gobierno ta tumando e asunto di integridad hopi na serio.”
