Diahuebs 15 di maart henter area di Caribe lo tin un training riba e peliger di e fenomeno di tsunami cual lo hiba e nomber di Caribe Wave pa conscientisa comunidad riba e tema.
Bureau Rampenbestrijding (oficina di prevencion desaster) Aruba ta informa cu te awor tin un cantidad di 15 instancia/organisacion registra cu lo participa activo den e training aki. Rampenbureau a invita prensa tambe pa forma parti activo na e training aki mirando cu prensa ta hunga un rol importante y necesario den caso di un incidente tuma luga cu consecuencianan grandi pa un pais. Algun puntonan pa tene na cuenta ta por ehempel pa companianan di prensa cu ta localisa den areanan di risico, con lo haci pa minimalisa daño pa asina mantene comunidad informa riba tur desaroyo.
Unda cu por ehempel si WEB ricibi daño grandi cual lo laga Aruba sin coriente pa un tempo, ki plan un compania di media lo tin e ora. E meta pues di e training aki ta pa prensa haya tur informacion oficial cu tin menasa di un tsunami. Prensa na su turno lo manda e mensahe di alarma di un tsunami via su medionan y ta haci e peticion pa tur cu a scucha e mensahe pa kende nan luz di auto y zona un pitro di e auto cada 10 minuut. Pa asina conscientisa e pueblo cu Aruba tambe por haya su mes confronta cu un desaster natural segun Rampenbureau.
‘Tsunami ready’ pa 2018
Aña pasa 5 di mei 2017 a bin dilanti pa Aruba a keda reconoci manera un pais cu ta tsunami ready y prepara pa cualkier menasa di naturalesa. Director di Meteo Marck Oduber, kende tambe ta e Tsunami Focal Point pa Aruba, a reuni cu director interino di Rampenbureau y dialoga riba esaki aña pasa. Diferente topico a keda discuti den e reunion aki relaciona cu fenomenonan natural. E idea tabata pa implementa e plan aki di reconocemento internacional di Aruba manera ‘tsunami ready’ pa 2018, y si no logra pa e bay 2019 na ultimo plaso.
Pa bin na remarca pa un reconocemento asina, Aruba mester cumpli cu entre otro un bon plan di operacion durante menasa di tsunami y un pueblo bon educa riba e puntonan importante. Entre otro tambe mester percura cu areanan di evacuacionnan den peliger di tsunami ta bon marca. Actualmente Aruba ta cumpliendo cu diferente di e rekisitonan aki pero tin algun hopi importante cu Aruba tabata falta pa cumpli cu esaki.
Durante Caribe Wave di aña pasa, a bin dilanti cu tin algun factor cu ta falta y cu ta keda cada bes como un discrepancia, y pa e motibonan aki a bin cu e programa Tsunami Ready pa Aruba. Ora e isla cumpli cu tur rekisito internacional, Aruba lo haya e reconocemento di Unesco/IGG/Caribe-EWS cual ta un reconocemento internacional.
