Training di Caribe Wave 2024 a tuma luga ayera mainta

For di 11or di mainta di ayera a tuma luga diferente training relaciona cu Caribe Wave 2024, unda a realisa diferente evacuacion pa por tin un bista di kico ta e preparacionnan cu por haci den e caso real di un tsunami.

Recientemente e fenomeno natural historico aki a determina e nivelnan di vulnerabilidad y riesgo pa e bida y medionan di sobrevivencia a traves di e tsunaminan a lo largo di e costanan di Caribe y regionnan cercano. Ehercicionan of training aki ta proporciona un incentivo fuerte pa paisnan por prepara pa un tsunami y pa comunidad participa den ehercicio aki.

Lothar Irausquin di Meteo a informa cu durante e ehercicio ta pone na prueba e canalnan di comunicacion pa ricibi e tsunami bulletin, centenares di persona a participa den dje den ultimo decada pa asina yuda fortalece e consciencia y preparacion pa e evento poco frecuente aki pero cu tin un impacto halto den Caribe.

Den ehercicio aki a pone dos escenario: un tsunami genera pa un teremoto di Mw 8,47 na trench di Panama y otro genera na trench di Puerto Rico di Mw 8,7, cu olanan entre 1 y 3 meter di haltura y ora esey ta tuma luga asina, e criterio ta pa tur hende ta pa evacua e beachnan, e prome ola lo mester a yega 1 ora y 43 minuut despues di e teremoto.

E prome boletin di Crisis Management Ofiice (CMO) di ayera dirigi pa stakeholders manera brandweer, polis y prensa tabata 11or di mainta ora tur training a cuminsa, e di dos tabata 11.30 y ultimo 1.30 di atardi indicando cu “no tabatin mas peliger di tsunami pa Aruba.”

Segun por a compronde for di Hermans, esaki ta ultimo biaha cu Aruba ta bay train cu e sistema aki, otro aña lo tin training cu Early Warning cu na augustus di e aña aki ta bay keda inaugura y Aruba ta bay den direccion di alarma nacional cu ta bay tin ademas di e sirena, e bos, e cual ta duna indicacion di kico tin cu haci despues di esaki.

Nan a monitoria cuanto hende a participa y cuanto hende lo a fayece door cu segun Hermans a señala, Aruba tin un tendencia cu no ta train of no ta participa pero ora cu algo ta sosode, ta cuestiona y critica.