Recientemente na Horacio Oduber Hospital (HOH) tabatin un momento masha special unda ta mira sigur e cooperacion solido cu ta trahando riba dje ya pa algun tempo entre e diferente islanan den Caribe Hulandes y region. HOH a invita un ciruhano for di Corsou pa un operacion specifico riba nos isla.

Dokter Yuri Casseres, ciruhano general, a comenta cu a invita dokter Nicole Boye, ciruhano di pulmon y colorectal, pa asisti den un operacion complica na nos Hospital. Dokter Casseres a splica cu e tipo di operacionnan asina ta bon pa haci den cooperacion entre ciruhano mirando e complehidad. Y sigur e pashent su bienestar na prome luga mirando cu e no mester a bay den exterior pero por a keda Aruba den compania di su famia.

Union ta forsa

E colaboracion cu HOH tin den region cu e diferente organisacionnan den cuido esta Dutch Caribbean Hospital Alliance (DCHA) tin como meta pa garantisa y eleva cuido specialisa den futuro y coordina y optimalisa calidad y disponibilidad di cuido specialisa.

Dr. Casseres a indica cu e tabata un asina yama ‘kijkoperatie’ caminda a saca un pida di e pulmon p’asina e pashent por hala rosea miho. Esaki tabata e prome biaha, pues na Aruba, cu ta haci e tipo di operacion aki caminda ta reduci e volumen di e pulmon via un “kijkoperatie”. E ciruhano di pulmon y colorectal, esta dr. Boyé a expresa di ta masha contento cu e cooperacion aki. Trahando hunto, specialmente cooperacion entre e islanan sigur lo por hisa e nivel di cuido pa loke ta trata pulmon y mucho mas.

Dr. Boyé

Dr. Boyé a expresa cu el a sinti su mes “bonbini” na Aruba y a disfruta e cooperacion y traha hunto cu dr. Casseres. Coleganan sigur a dun’e e sentimento di cas na HOH. Ademas el a expresa cu e por a conta cu tur e materialnan necesario pa eherce e operacion di un manera exitoso mirando cu HOH tabatin tur loke e mester “den cas”.

E operacion riba su mes a bay mas lihe di loke nan a spera. Dr. Casseres a indica cu el a siña algun tecnica nobo for di dokter Boyé cu e por sigui eherce durante su operacionnan na HOH.

Cooperacion entre islanan ta keda un reto, pero ta e pasonan aki, aunke chikito, ta haci finalmente un impacto grandi. Dr. Boyé y dr. Casseres ta demostra cu intercambio di conocemento tin un impacto positivo y den e caso specifico aki ta yuda amplia cuido na Aruba.