E Ordenansa Nacional di Centro di Cuido di Mucha (Kinderopvang) a haya aprobacion unanimamente den Parlamento. Esaki a exigi algun aspecto huridico y organisatorio esencial, unda cu Gobierno mester asumi cierto responsabilidad y esey a keda netamente haci bao maneho di ministerio di Asuntonan Social.

Despues di algun analisis di estudio y raport, a opta pa lanta un Departamento di Mucha y Hoben (DMH), cu ta cay den e programa y presupuesto di Sociaal Crisis Plan. E Departamento di Mucha y Hoben (DMH) ta actualmente den su proceso final pa asina por cuminsa fungi huridicamente y oficial.

Pa por cumpli cu e exigencianan di e Ley di Kinderopvang a crea y start un estudio di MBO-3 ‘SPW opleiding kinderopvang’ conhuntamente cu FEPA y Fundacion Pa Nos Muchanan, pa e cabesantenan of propietario di Centro di Cuido di Mucha, cu no tin e nivel di estudio aki ainda. Dia 4 y 11 di september 2021 ultimo, e cabesantenan di tur Centro di Cuido di Mucha na Aruba tabatin e oportunidad pa registra p’e estudio. Nan mester a entrega algun documento rekeri, pa asina por inscribi y bin na remarca pa por sigui e estudio aki, cu ta programa pa cuminsa na januari 2022.

E siguiente paso ta, cu DMH ta sinta hunto cu Inspectoria di Enseñansa, pa asina por revisa y evalua tur e documentonan aki, pa conclui ken tur ta bin na remarca pa start e estudio. Dependiendo di e proceso aki y e cantidad di inscripcion cu a ricibi, lo tin posibilidad pa tur esunnan cu a registra, participa na e estudio aki. Te cu awor DMH ta hopi satisfecho cu e cantidad di participante inscribi, cu ta suma un total di 55 persona, di un total di 108 Centro di Cuido di Mucha, cu ta registra na DMH.

Kier a enfatisa cu e estudio di un MBO-3: SPW-opleiding kinderopvang ta ekivalente cu loke ta duna na EPI den e ramo di bienestar social y ta un di e rekesitonan, na momento cu e Ley KOPV drenta na vigor, unda lo e ta mara na un fase di transicion. Pues ta altamente recomendabel pa tur cabesante cu no tin un diploma di e nivel aki menciona, cumpli cu esaki dentro di e periodo di transicion.

Na mesun momento kier enfatisa tambe cu e curso: Urgentie Opleiding Kinderopvang, duna na 2003 bao supervision di Openbare Avondleergangen (OAA), ta riba un nivel di LBO. Pues loke nos ta brindando awo, ta un nivel mas halto y ta loke ta poni como exigencia den e ley.

Si acaso bo Centro di Cuido di Mucha no ta registra ainda por haci esaki via email adres: dmharuba@gmail.com.