Diadomingo ultimo, fundacion Elsa Coffi (F.E.C.) a organisa un charla pa tur maestro riba e topico ‘Con pa Señala Abuso di Mucha’. E charla aki cu a tuma luga den e collegezaal di EPI a conta cu presencia di minister di Enseñansa, Rudy Lampe.

Minister Lampe a considera e charla aki como un iniciativa importante a base di e reflexion cu a wordo haci di e suceso tragico di e dos mucha Rishandroh y Eugene. El a haya for di e veld di maestronan e sugerencia cu mester bin mas training pa maestronan. Pa asina aki nan por sa e momento di detecta señalnan cu lo por tin caso di abuso di un mucha pa medio pa ehempel di pintura, etc…

Tin specialistanan cu por duna e tipo di training aki, ya cu e maestro ta e prome cu ta topa tur e problemanan social cu un mucha ta enfrenta. Casi tur mucha na Aruba ta bay enseñansa primario y e maestro ta esun cu mesora ta wordo confronta cu e tipo di problemanan aki. “E problemanan social ta enorme. P’esey e maestronan mester wordo getraing, mester wordo apoya, motiva den nan trabou, pasobra e ta un trabou sumamente pisa, ” e mandatario a bisa.

E necesidad di reforsa e trabou di e maestronan cu asistencia di profesional riba tereno di psicologia pa yuda e muchanan cu tin problema ta un prioridad. “Nos ta trahando aworaki pa fortalece structura di cuido na scolnan.” E ta reconoce cu ta falta mas apoyo den e sentido ey. Nos sistema di enseñansa aworaki ta enfrenta e reto nobo ey, cu nan ta bay fortalece e structura di cuido cu ta encera entre otro trahadonan social, psicologonan, etc… E ta spera cu pronto lo por anuncia cierto plannan al respecto cu nan ta trahando riba dje aworaki.

Derecho Humano y Derecho di Mucha
E ta contento cu e fundacion aki a bin cu e iniciativa di e charla aki ariba dia 10 di december cu a conmemora Dia Internacional di Derechonan Humano. E mandatario a anuncia cu otro aña 2018 nos ta bay recorda cu 70 aña pasa Nacionnan Uni a bin cu e Declaracion Universal di Derechonan Humano. “Awe mi ta kere cu ta un inicio di un ciclo cu mester dura un aña pa pone atencion riba e topico di derecho humano”, el a bisa.

Pa medio di e declaracion aki a wordo declara cu tur hende tin e mesun dignidad humano no ta importa nan religion, sexo, color di cuero, ya cu ser humano tur ta igual y tin e mesun derecho y a base di e declaracion aki a nace tambe e derecho di mucha. Segun minister Lampe, nos tin cu reconoce na Aruba e rapport di Unicef 2013 ta indica cu nos pais no ta den un situacion ideal pa respet di derechonan di mucha. E ta haya cu cada dia tin mas yamada ta wordo raporta di caso di abuso di muchanan.”

E mandatario a indica cu e tema di e charla di e fundacion aki tabata hopi na su luga. Tambe e tin hopi admiracion y respet pa e trabou nan ta desplega. E fundacion Elsa Coffi tin mas cu 10 aña di existencia y el a wordo lanta pa organisa charla educativo riba topico en general.

Fundacion F.E.C.
Presidente di F.E.C., Yvette Hassel a declara na Bon Dia Aruba cu e meta tras di e charla aki ta pa conscientisa e hendenan ariba e topico di abuso sexual y abuso en general di mucha chikito. Aunke inicialmente e grupo meta tabata e maestronan, finalmente nan a dicidi di habri e charla pa tur publico.

Nan intencion tras di e charla aki tabata pa informa riba con pa detecta e señalnan cu e muchanan victima di abuso ta expresa su mes. Pero tambe pa revela tambe e efectonan psicologico cu ta keda cu e persona cu ta wordo abusa fei chikito.

“E ta keda cu un trauma pa e resto di nan bida cu nan tin cu deal cu ne di hopi forma,” asina el a declara na Bon Dia Aruba.

E reaccion di e publico tabata interesante probechando e presencia di e mandatario Lampe di Enseñansa. Igualmente e fundacion a tuma nota di tur e preocupacionnan expresa y nan lo haci un siguimento di nan pa eventualmente organisa cu mas tempo otro charla rond di e topico aki.


Sra. Hassell a bisa cu nan idea inicial tabata pa tuma contacto cu SKOA, Simar, y otro organisacionnan of fundacion cu tin di haber cu enseñansa, pero e proceso no a bay di e bon ey. P’esey nan ta pensando di bin cu otro, ya cu esaki ta un principio. “Esaki ta manera nos ta planta un simia y otro biaha nos ta hacie mas miho.”

Secretaria di F.E.C. Fejite Zijstra a remarca cu e fundacion aki ta busca conscientisa pueblo y cada aña nan ta bin cu un of dos conferencia di diferente topico. Tambe nan ta presenta bukinan. Pero e biaha aki mirando cu ta wordo papia di e buki BOA cu a wordo publica cuater aña pasa. Pero despues di e tragedia di e dos mucha ruman victima di abuso y asesinato, e fundacion a pensa pa acerca nos maestronan, ya cu nan ta tres hendenan cu ta docente den e fundacion. Nan kier habri un caminda tambe pa e maestronan por wordo miho scucha tambe.

Aunke e charla aki tabata bon atendi, e presencia di publico por tabata mas grandi, debi cu e lo wordo pura hinca den otro. “Con bo por haya hende pa trece di nan parti y pa yuda.” Nan lo tin platia di organisa otro evento y ya caba nan tin combersacion cu fundacion Respeta Mi y otro fundacionnan cu ta traha cu mucha pa conhuntamente traha hunto y duna training na diferente nivel di enseñansa. Nan ta bay haya training y nan ta bay trece over pa nan coleganan. Igualmente nan lo bay envolvi mas hendenan entre otro e mesun mayornan pa asina tur hende bira consciente riba kico mester wak pa preveni abuso di muchanan. “Prevencion ta e cos di mas grandi “, el a bisa.

Sra. Zijstra a referi na e preocupacion cu un di e oradonan invita, psicologo Dimitri Halley a tece dilanti caminda hopi hende cu a pasa den abuso di mucha ta keda cu un trauma henter nan bida. Pero pa e hende aki cu mester terapia no tin placa disponibel, ya cu AZV ta manda nan pa un psikiatra, pero un psikiatra hopi bes ta pildo ta duna, y pa yuda un victima di abuso no ta solamente pildo. Tambe ta presenta e ‘caso cu hendenan cu a pasa den e tipo di abuso aki despues e mes ta bira un abusado’,  secretaria di F.E.C a bisa.