Januari tabata un luna tras di lomba caba cu a bira uno di referendumnan cerca Mediador di Gobierno cu a wordo celebra den varios compania y fundacion.
Diahuebs siman pasa e controladonan di trafico aereo na servicio di ANSA a eligi FTA como nan sindicato. Diabierna ultimo e trahadonan di Fundacion Facilidad Deportivo (FFD) tambe a eligi FTA como nan representante sindical.
E siman aki nan ta pendiente pa referendum di e trahadonan di Arubus pidi pa sindicato SEPPA. Otro referendum tin di haci cu e trahadonan di Eagle Resort & Casino. Tambe nan ta pendiente cu e referendum di e trahadonan di De Palm Car Rental cu a wordo pidi pa sindicato FTA.
Dirigente sindical di FTA, Tyrone Bremo kende tabata presente como observador a bisa cu di e cantidad di 29 trahado di FFD cu a participa den e referendum di diabierna ultimo, un total di 19 a haci uzo di nan derecho, 17 di nan a vota na fabor di FTA. Nan ta haya e mayoria, kiermen e mita plus un di e votonan manera e ley di referendum ta stipula. Awor FTA ta representa e trahadonan cu antes tabata afilia na SEPPA.
El a laga sa cu e preocupacion di e trahadonan aki tin di haci cu nan beneficionan manera a yega di sosode den otro fundacion y compania estatal.
“Nan ta preocupa riba kico lo bay pasa den e tempo aki,” el a bisa. E sindicalista a agrega cu tur caminda nan ta scucha cu lo wordo teni mas cortamento den beneficio, y e trahadonan ta busca un manera pa por haya afiliacion y representacion sindical cu por defende nan derechonan adkiri.
