Centenares di empleado ta criticando publicamente e record di Amazon pa cu cambio climatico, a pesar di locual nan ta bisa ta un politica di e compania cu ta pone nan trabou den riesgo door di papia.

Diadomingo, mas di 300 empleado di e gigante online a firma nan nomber y titulo laboral na declaracionnan riba Medium. E protesta online tabata organisa pa un grupo yama Amazon Employees for Climate Justice, un grupo defensor funda pa trahadonan di Amazon cu e luna aki a bisa cu e compania a manda carta na su miembronan menasando nan cu retiro si nan sigui papia cu prensa.

“Ta nos responsabilidad moral pa papia, y e cambionan na e politica di comunicacion ta censurando nos di cumpli cu e responsabilidad aki”, segun Sarah Tracy, ingeniero di desaroyo di software na Amazon, den un declaracion.

Amazon a bisa cu su politica pa comunicacion externo no ta nobo y ta similar na otro companianan grandi. E ta bisa cu e politica ta aplica na tur empleado di Amazon y no ta dirigi riba un grupo specifico.

“Mientras tur empleado ta bonbini pa participa constructivamente cu cualkier di e cantidad di team den Amazon cu ta traha riba sostenibilidad y otro topico, nos ta cumpli nos politica di comunicacion externo y no lo permiti empleadonan pa desacredita of mal representa e compania of e trabou fuerte di nan colega ken ta desaroyando solucion na e problemanan dificil aki”, segun un vocero di Amazon.

Amazon, cu ta depende riba combustibel fossiel pa e avion, truck y van cu ta manda pakete rond mundo, tin un footprint di carbon enorme. Y su trahadonan ta expresivo pa critica algun di e practicanan di e compania.

Aña pasa, mas di 8mil miembro di personal a firma un carta habri na CEO y fundado, Jeff Bezos, exigiendo pa Amazon reduci su emision di carbon, caba cu uzo di fuel fossiel, y stop su trabou cu companianan petrolero cu ta uza tecnologia di Amazon pa localisa deposito di combustibel fossiel.

Amazon a bisa den un declaracion cu ta apasiona pa asuntonan di cambio climatico y ya a compromete pa bira ‘net zero carbon’ pa aña 2040, y uza energia 100% renobabel pa aña 2030.