seppa dia obrero (1).JPG

Den cuadro di celebracion di Dia di Obrero, sindicato SEPPA ta bisa cu e fecha aki nos por tende e gritonan di e trahadonan cu ta bin for di tur skina bisando: “Nos cartera ta bashi!!”

SEPPA ta trece dilanti cu na Aruba aunke cifranan por papia diferente y ta mustra cu no tabatin un inflacion, esta cu costo di bida no a subi, e trahado ta sinti esaki tur dia!!.   Mas aleu di loke ta cuestionabel desde e punto di bida moral esaki ta trece consecuencianan economico grave. 

E demanda y e poder di compra di nos pueblo, di e consumidor ta keda reduci.  Tur hende ta sinti e efecto aki den su cartera, den su biba. Ta p’esey mes e trahado ta sinti  e dolor pasobra su cartera cu ta bashi y apenas ta sobrevivi, segun SEPPA.  Cu salario minimo a conoce un aumento chikito…si ta berdad !! Pero prijs di productonan tambe a subi barbaro !! e sindicato aki a laga sa. 

Preocupacion financiero

E situacion reinante di awe ta forsa tambe e trahadonan hoben pa pospone hopi di e pasonan cu hobennan tradicionalmente ta tuma den comienso di e bida di un adulto. Un di nan sigur ta di keda biba cerca nan mayornan paso entrada no ta yega pa nada corda pa construi riba puramente “soñonan”!. 

Hopi  ta haya nan mes obliga pa para un rato nan studio of desaroyo profesional debi na preocupacionnan financiero.    Pero e rekisito di educacion of training no ta garantisa trahadonan hoben un empleo pa cual nan a prepara nan mes.   Loke ta haci e situacion pa e trahadonan hoben malo –segun SEPPA- ta e hecho cu nos ta papiando di empleonan cu salarionan abao.

Pero loke ta empeora e situacion mas cu empleonan aki cu salario abao no ta ofrece tampoco beneficionan di caracteristicanan di ‘bon empleonan’.  Hopi biaha e trabaonan aki no tin seguronan medico cu ta ofrece cobertura extra di loke AZV ta ofrece.  Y si tene na cuenta cu ya caba entrada di e grupo di e trahadonan aki ya ta abao, ya e trahadonan aki ta den un situacion di sobrevivencia pues e posibilidad pa spaar algo pa eventualidadnan, manera perdida di trabao uno nihil.

Den caso di malesa na unda e trata di mehora e situacion di esnan cu pa motibo di malesa no por traha, SEPPA ta mira con di otro banda dunadonan di trabao a core yega na acuerdo cu trahadonan cu desde e prome dia di AO caba ta paga solamente loke SVB ta cubri.

 

Trahadonan cu no mucho informacion, presiona y den mayoria di caso ta wordo obliga pa firma un acuerdo muy apesar cu nan sa cu esaki ta desfaborece su persona y tin hasta contra reglanan. Pues pa trahadonan cu un entrada abao, e barera di independencia personal pa financiero ta mustrando uno insuperabel.