— Cu un luna prome cu Pasco, henter staf di Señor Frog’s a keda sin trabou di un dia pa otro despues cu un representante di e doño di e frankesa a cera e luga y a anuncia cu Señor Frog’s a stop di existi na Aruba.
Audrey Wever, HR y accounting manager di Señor Frog’s, ta informa Bon Dia Aruba cu antayera nochi, un ora prome cu ora di cera, pa nan sorpresa empleadonan di Señor Frog’s a mira Daniel Orozco, e representante di Anderson Group – propietario di e frankesa – cana drenta y pidi clientenan pa bandona e sitio. For di eynan Orozco lo a pidi pa e yabi di e luga y e entrada di dia cu tabatin den safe, cual tabata e suma di 6000 florin. Eynan Orozco lo a anuncia na e trahadonan cu nan por cuminsa busca pa otro trabou e proximo dia pasobra Señor Frog’s lo no ta operacional mas na Aruba. Ayera mainta, empleadonan a ripara cu tur e locknan di e edificio den The Village na Palm Beach a wordo cambia. Di pafo nan por a mira cu a saca tur aparato, for di e dj booth y e televisionnan te cu e freezernan. For di eynan, bou guia di Wever y marketing manager Starr Ramos e empleadonan di Señor Frog’s a bay Bestuurskantoor pa busca contacto cu minister Paul Croes di Labor.
Hecho ta cu pa un aña y mey caba, trahadonan di Señor Frog’s tabata den incertidumbre pa loke ta futuro di nan trabou. Segun Ramos e negoshi tabata na benta y un aña y mey pasa a purba bende e operacion cu e morochonan Neme, kende ta propietario di The Village na unda Señor Frog’s ta situa. Doñonan di Anderson Group a bin Aruba for di Mexico pa yega na un deal y firma cerca notario, pero na ultimo momento e deal no a sigui. Segun Ramos e propietarionan a dicidi pa continua e operacion di Señor Frog’s, sinembargo no a haci ningun inversion mas den e negoshi, lagando por ehempel renovacionnan necesario sin wordo haci. Tempo a pasa te cu un siman pasa, ora cu management a haya di compronde cu nan mester baha tur e borchinan y branding for di e edificio. Segun Ramos ningun splicacion a wordo duna, mientras cu esaki normalmente kiermen cu lo tin intencion di cera e luga. E empleadonan a yama abogado Delo Gomez, kende a traha un carta pa abogado Allan Kuster, kende ta representa e doñonan di Señor Frog’s na Aruba, pidiendo un splicacion pero nan no a haya ningun respuesta. Antayera nochi Daniel Orozco, kende normalmente ta e persona representando Anderson Group na kende e management ta responde, a cana kibra den Señor Frog’s y a cera e luga. Despues Orozco lo a duna e yabi di e luga na e morochonan Neme, bisando nan cu despues di 26 aña, te aki Señor Frog’s su existencia na Aruba a termina. Ramos ta bisa por cierto cu e rumannan Karim y Maurice Neme a mustra di ta hopi cooperativo pa cu e trahadonan, te hasta bisando cu nan lo kier tene Señor Frog’s habri pero no sa con esey lo funciona legalmente.
A purba huy
Mientras tanto, na dado momento tabatin informacion cu Orozco ya tabata bandonando Aruba. Na prome instante e informacion tabata cu e lo tabata caminda pa Panama, pero a sali na cla cu e tabata cla pa sali bay Miami. Sinembargo, Orozco su number a hunga ora cu salida di e vuelo a wordo para y Emigracion a ordena su persona pa bandona e avion y haci un bishita na Departamento di Impuesto, ya cu Señor Frog’s aparentemente tabatin un par di cuenta habri eynan. Unabes pafo di sala di Arrivals, Orozco a topa cu e grupo di trahadonan di Señor Frog’s. Starr Ramos a transmiti e confrontacion aki cu a hera bay for di man te ora cu polis a yega riba Facebook Live. Orozco, sigui pa e grupo di trahadonan a coy su caminda y bay pa edificio di SIAD. Minister di Labor Paul Croes ta bisa cu riba su instruccion Orozco a keda deteni na aeropuerto pa motibo di falta di incumplimento cu leynan laboral y leynan fiscal. Croes ta indica cu tabata tin un encuentro entre SIAD y Departamento di Labor pa asina evalua e situacion di e compania. Den e encuentro aki a sali na cla segun minister Croes cu e compania a bay di acuerdo cu cierto condicion nan pa e trahadonan, kende a pesar di a logra confronta Orozco, ainda ta den incertidumbre completo pa cu nan futuro.
