Gerencia di WEB, sr. Luis Oduber a lamenta cu despues cu nan a logra un pakete hunto cu sindicato SIWA pa medio di intermediacion di Mediador di Gobierno, e trahadonan a rechasa esaki ayera tardi.

Anochi ora cu sr. Oduber a haci su declaracion banda di 7’or y  mey for di Tele Aruba, gerencia di WEB mes no tabata sa precies pa kico e trahadonan a rechasa e pakete aki. Ayera nochi ambos partido a bay cerca Mediador di Gobierno bek pa asina evalua e exigencianan cu e trahadonan ta expresa pa medio di nan sindicato.

Di su banda gerencia di WEB a pidi su coleganan pa reconsidera nan posicion, ya cu e ta haya cu sin duda e ta un bon pakete. Practicamente Sr. Oduber a bisa cu di parti di gerencia a wordo duna tur loke nan por duna, y naturalmente nan no por duna mas, fuera di loke nan por financieramente.

“Locual nos a ofrece aworaki ta e maximo cu nos por”, el a bisa.  Niun hende a bay atras, pero e discusion ta “con hopi nos kier bay dilanti”, segun sr. Oduber. 

Tur empleado di SIWA ta participa den e welga aki. A pesar di e situacion aki, gerencia di WEB a compromete su mes pa garantisa e suministro di e servicio di awa y produccion di coriente. Pa tal motibo e staf di WEB ta atendiendo cu e operacion di e planta conforme cu un plan di contingencia cu nan tin. “E operacion ta bayendo bon. Te aworaki no tin niun complicacion”, segun Sr. Oduber.  El a bisa cu e interupcion di coriente cu a presenta ayera madruga no tin di haber cu e accion di trahadonan di WEB.

Mediador di Gobierno

Ta asina cu despues di un par di dia di tension y expectativa, finalmente ayera traimerdia tanto gerencia di WEB y sindicato SIWA a yega na un pakete cu supuestamente lo mester a trece e paz laboral bek den e compania di utilidad aki. Pero e trahadonan a dicidi otro…

E pakete aki a wordo logra cu intermediacion di Mediador di Gobierno, sr. Anselmo Pontilius den presencia di miembronan di e hunta di comisario di WEB. Ayera Sr. Pontilius a sinta mainta cu hunta di comisario y cu gerencia di WEB, y separa cu sindicato cu e firme determinacion cu e partidonan aki mester busca un salida. Y e salida a tuma luga den oranan di merdia caminda nan a yega na un supuesto pakete pa e proximo dos añanan.  

E acuerdo logra ta inclui aumento general cu ta tuma luga dia 1 di januari 2017; pero tambe 1 di januari 2018. E aumento ta di 195 florin pa luna tanto na 2017 como na 2018. Tambe e trahadonan lo haya un compensacion di mil florin den luna di december; ademas di un compensacion individual directo na januari di 2017 y 2018.  E acuerdo aki ta core for di januari 2017 te 31 di december 2018.

Evaluacion aumento salario

Pero durante e reunion cu Mediador di Gobierno no solamente e partidonan a acorda aumento di salario y otro beneficionan secundario, sino cu nan lo trata e introduccion di un sistema di evaluacion pa aumento di salario.

E sistema di aumento di salario automatisa no ta sigui mas, despues cu e acuerdo aki ta caduca dia 31 di december 2018. Durante e dos aña siguiente ambos parti mester percura cu e sistema nobo di mehoracion di salario directo of indirecto, ta wordo canalisa di otro forma.  

Sr. Pontilius ta haya cu aworaki ta e momento pa tanto gerencia di WEB como SIWA por cuminsa traha riba e sistema nobo di mehoracion di salario pa ora cu 2019 yega, nan por atende cu esaki debidamente.