Trahadonan Latino mas interesa den sindicalismo

E generacion nobo di sindicalistanan na Aruba ta conociendo cada bes mas e presencia di e trahadonan di origen Latino den nan organisacionnan sindical.

Den su ultimo curso di capacitacion cu Federacion di Trahadonan di Aruba (FTA) a organisa pa nan delegadonan. E tabata e di dos curso basico pa nan caminda entre nan e presencia di trahadonan Latino cu aspiracion sindical tabata presente.

E interes riba e curso aki tabata grandi y e presencia di e trahado Latino interesa di drenta den mundo sindical local, presidente di FTA, sr. Hubert Dirkzs ta mira esaki como “un balor agrega” pa na organisacion.

E sindicalista Dirkzs a bisa cu FTA ta pensa cu basa na e experencia cu e trahadonan aki tin fei nan pais di origen y loke nan a yega di experencia riba nos isla ta loke ta motiva nan pa drenta sindicalismo.

Presidente di FTA ta haya cu algun di e trahadonan aki a pasa den duro caminda hopi biaha e trahadonan aki cu ta bini di e paisnan di e region, ta yega Aruba y nan ta bira victima di explotacion. “Nan ta pasa momentonan no agradabel”. 

Despues di tanto tempo cu nan ta pasa cu resignacion den e situacion di explotacion, caminda nan ta soporta hopi, unabes cu nan ta haya un stabilidad y garantia legal, ya sea pa medio di nan paspoort Hulandes of cu nan ta casa cu hende local, nan ta dicidi di bisa: basta!. Asina e veterano sindicalista a indica.

“Esey ta haci cu nan ta drenta cu un forsa masha grandi mes pa drenta den e sindicato, y te ora nos ta sinti cu te hasta cu e forsa di nan ta mas grandi cu di nos”, segun presidente di FTA.

Abuso laboral

Sindicalista Hubert Dirkzs a declara cu e entusiasmo di e trahadonan aki pa sindicalismo ta grandi pa kita e abusonan cu ta tumando luga. E ta lamenta si loke den seno di nan organisacion sindical nan ta tendiendo hopi di e noticianan cu tin un cantidad di abuso di trahado na Aruba.

“E ta lamentabel! Y specialmente contra e trahadonan aki cu ta bini fei e region”, el a bisa.

Den e curso basico di capacitacion sindical tabatin presencia di trahadonan entre otro di origen Dominicano y Colombiano, cu a participa hunto cu e delegadonan local.

Presidente di FTA ta haya hopi interesante e desaroyo aki ya cu niun di nan ta hendenan sin experencia di bida. “Nos ta enrikece cu e participacion di nan”, el a bisa na Bon Dia Aruba.

Actualmente FTA tin alrededor di 95 delegado y e parti mas grandi di nan ta e sector hotelero, caminda nan tin mas cu 40 delegado. Mientras cu e resto mas tanto ta di e sector bancario, comercio, transporte, comunicacion, etc…