WILLEMSTAD – Recientemente e delegacion di sindicato UGTK-Cadmu a bay sede di gobierno di Corsou unda a topa cu minister president y minister di Planifikashon Urbano (VVRP). E grupo tabata na un manera masha respetuoso, pero por a sinti un emocion grandi y pisa di parti di e trahadonan pa e forma trankil pero sumamente preocupa cu nan a expresa.

Wendell Meulen di Cadmu a bisa cu nan a haya un carta di gobierno cu ta indica cu no por prolonga e permit di operacion (AOC) di Insel Air. E sindicato y e trahadonan kier haya claridad si awor cu e carta aki sali ta nifica cu mester cuminsa e proceso di AOC completamente di nobo of si por sigui caminda nan a yega caba. Meulen a mustra cu Insel ta canando e proceso di AOC pa algun tempo caba y ta asina cu tin algun parti cu ta cla caba. UGTK-Cadmu ta bay reuni cu e inversionistanan y den e cuadro ey ta importante pa haya e claridad necesario.

Otro preocupacion cu nan a expresa ta cu e actual director di departamento di aviacion civil sr. De Jong lo ta den hunta di comisario di e compania competido di Insel cu ta Winair. Riba e punto aki minister Zita Jesus-Leito a reacciona mesora y splica cu aña pasa de Jong a tuma retiro y bay for di Corsou. Hulanda a pidie pa e drenta e hunta di comisario di Winair y el a acepta. Tempo cu tabata busca un director pa e departamento Jesus-Leito a bay Hulanda y aya a sugeri e minister pa tuma de Jong. A duna de Jong un tempu di 9 luna pa atendé asuntonan na departamento di aviacion di Corsou. E director a informa e minister cu e ta den comisariado di Winair. E momento ey a palabra cu de Jong lo no atende nada di Winair den departamento di aviacion, lo laga na su suplente pa atende eseynan y asina evita conflicto di interes.

Pa loke ta trata e AOC, minister Jesus-Leito a declara cu ta for di mei 2018 a duna chens na Insel Air pa regla su asuntonan. Pues gobierno a duna chens pa e compania sigui haci su trabounan, pero mester tene cuenta cu ta bin audit anto Corsou por hay’e den mas problema y no por falta cu ley. Gobierno a duna Insel tur oportunidad pa cumpli cu ley. Ta depende di e compania pa logra, gobierno ta duna tur cooperacion.