“E trahadonan di TeleAruba ta bastante disgusta”, asina presidente di sindicato STA, Diego de Cuba ta declara na Bon Dia Aruba.
Ta asina cu un grupo di trahadonan a acerca STA pa afilia na e sindicato aki; y e sindicato lo pidi pa un referendum; a pesar cu STA a pone un stop na e cantidad di companianan afilia na nan. Sinembargo den e caso aki, STA ta kere cu e trahadonan di TeleAruba ta merece miho.
“TeleAruba ta nos planta nacional y locual ta pasando akinan no ta bon. Mi ta sinti cu practicamente nan ta convertiendo TeleAruba den un di dos ATV”, sr. De Cuba ta bisa. Tin mas o menos 21 trahado di TeleAruba cu eventualmente lo ta interesa pa afilia na STA, segun e.
Den pasado sindicato FTA a yega di representa e trahadonan di TeleAruba; pero un mayoria di e trahadonan grandi aki no ta traha mas cu e planta di television. Aworaki e trahadonan ta yenando e formularionan como rekisito pa oficina di Mediador di Gobierno lo por convoca un referendum. “Mi ta kere cu den transcurso di e siman aki nan ta keda cla”, sr. De Cuba ta bisa.
Malcontento
E motibo di malcontento di e trahadonan di TeleAruba ta varia, pero e principal di nan tin di haber cu salario. E lider di STA a cualifica esaki como ‘un situacion penoso’. El a bisa cu ora e mes a mira e salario di e trahadonan nan ta haya cu berdaderamente, e trahadonan di TeleAruba tabata gana miho salario. “Pero ora mi a mira e salario cu nan ta ganando, m’a keda sorprendi con nan salario ta asina abou.” Igualmente el a laga sa cu nan beneficio tambe ta laga hopi di desea.
