Awor cu e negociacion entre Gobierno y Valero a termina y cu nos pais a bira propietario di e refineria, minister di Labor, Sr. Paul Croes a expresa na Bon Dia Aruba cu ya caba tin un desaroyo andando riba tereno laboral.
El a bisa cu ainda e ley mester bay Parlamento pa asina e negociacion cu a tuma luga cu Citgo y Valero lo por haya su aprobacion. Pero nan tin un indicacion cu “firmemente Parlamento ta para tras di e ley aki, mirando impacto economico cu esaki tin pa nos pais”.
E impacto no lo ta economico so, sino laboral ya cu –segun e mandatario- nos ta papiando di alrededor di 1200 cupo di trabou directo y localmente.
Sin conta e contratistanan cu lo realisa trabou pa rehabilita y renoba e planta cu tin den e refineria. Otro aspecto cu el a trece dilanti tin di haber cu e comercialisacion rond di e refineria cu lo crea mas cupo di trabou, segun minister Croes.
Di otro banda e trahadonan cu ainda tabata na servicio di Valero y representa pa e sindicato IOWUA, nan garantia laboral lo wordo protegi segun nos lo ley laboral. Minister Paul Croes a bisa cu e grupo di casi 100 trahado ta bay over den e refineria den su capitulo nobo.
E trahadonan aki ta trahando keto bay den e refineria y nan lo continua cu nan trabou, pero na servicio di Citgo. El a bisa cu e trahadonan di Valero ta sigui cu nan prestacion laboral, ya cu e leynan laboral cu ta regarda Aruba ta aplicabel pa e refineria.
“Tur trahado cu tin tanto aña di servicio, na momento un refineria ta bisa bo, bo mester bay cas, nan tin cu paga bo e añanan di servicio”, el a bisa.
E ta premira cu tur trahado cu ainda tabata trahando cu Valero lo wordo tuma den Citgo teniendo na cuenta nan añanan di servicio y derechonan adkiri.
Segun minister di Labor, nan lo keda monitor pa e proceso aki bay den un forma positivo, tanto pa e trahadonan local como esunnan nobo cu ta drenta den e refineria.
