E preocupacion di e trahadonan di e terminal na servicio di Citgo a bira mas grandi awor despues cu e compania a anuncia cu nan no tin mas placa pa cumpli cu nan obligacion di pago di salario di e trahadonan.
Un situacion ta birando mas scur ainda ora cu a keda conoci un caso cu e compania Crystallex a gana den corte na Merca, cu eventualmente lo tin su impacto riba e contracto firma entre pais Aruba (RdA) y Citgo.
Ta trata aki di e trahadonan di staf cu a afilia na sindicato FTA cu a mustra nan preocupacion cerca gobierno. E situacion ta asina delicado cu lo ta evaluando pa Refineria di Aruba (RdA) cu ta un compania estatal doño di e refineria por tuma over e maneho di e terminal. Ainda ta existi un incertidumbre riba e impacto cu e situacion aki lo por tin cerca e trahadonan. Pero tambe riba e posibilidad di abastece nos pais di combustibel.
E situacion laboral a bira mas tenso ora cu a wordo conoci cu Citgo a informa gobierno y RdA cu nan no tin recurso financiero mas pa sigui atende cu su obligacion economico den e refineria y e terminal.
Dialuna mainta, un delegacion di FTA a tene un reunion cu Minister Presidente pa atende cu nan preocupacion. Pero e reunion aki no a conta cu presencia di representante di Refineria di Aruba (RDA). Durante e ultimo lunanan cantidad di trahadonan a wordo manda cas, y awor e reduccion aki a bati porta cerca e trahadonan di e terminal. E grupo di trahadonan aki ta buscando como prioridad un garantia pa mantene e cupo di trabou actual.
Segun informacion compila pa e matutino aki, RdA a haya autorisacion di nan directiva pa haci un analisis riba e terminal cu ta uno di suma importancia pa pais Aruba pa abastece nos di combustibel. E motibo di e analisis aki ta pa traha un acuerdo di entendimento (MoU) entre RdA y PDV Holding Citgo Aruba. Te ainda no ta conoci riba ki fecha e acuerdo aki lo wordo firma. Tur esaki lo depende di loke por a resulta di e analisis y di e negociacion haci entre Gobierno (RdA) y PDV Holding.
E MoU aki mester duna RdA e autoridad pa tuma temporalmente over e maneho di e terminal y asina cuminsa cu e posibilidad di busca un operador nobo. Bon Dia Aruba por a compronde cu tin varios compania interesa den e maneho of eventualmente compra di e terminal, mirando cu e ta un mina di oro. Pero loke ta preocupa e trahadonan ta e impacto cu esaki lo por tene cerca nan. Ta papia aki di un grupo di trahadonan cu tin añanan trahando den e refineria.
E matutino aki a haya sa cu e trahadonan afilia na FTA a haci un apelacion pa gobierno pone den e MoU un clausula cu por garantisa nan stabilidad laboral y salario. Esaki, mientras cu e proceso di negociacion tuma luga. Nan kier evita cu den e periodo aki mas trahadonan ta wordo manda cas.
