Diamars mainta 20 october trahadonan di Stichting voor Verstandelijk Gehandicapten Aruba (SVGA) a continua cu nan accion di protesta. Esaki a tuma luga net un siman despues cu nan a dicidi di tene nan prome accion pa pone presion riba e directiva di e fundacion aki pa nan cumpli cu e contracto colectivo (CAO).
Segun sindicato FTA cu ta representa e trahadonan di SVGA, e trahadonan a haya nan mes ta para trabou pa defende nan derecho cu e directiva di e fundacion aki no ta cumpliendo cun’e. E tin di haber specificamente riba e punto di e gratificacion di hubileo ora cu e trahadonan ta cumpli 25 of 30 aña di servicio. Nan lo mester ricibi un suma na momento cu nan ta cumpli e cantidad di añanan aki, pero actualmente tin un grupo di trahado cu ainda no a haya e beneficio aki.
Den combersacion cu Bon Dia Aruba a yega di sostene cu director di SVGA, sr. Arturo “Tuyo” Werleman, el a laga sa cu nan ta reconoce e derecho cu e trahadonan tin riba gratificacion di hubileo. Pero lamentablemente nan no por cumpli pasobra gobierno no a cumpli cu nan tampoco, y nan como fundacion no tin placa. Te hasta el a bisa cu si e sindicato kier lanta un caso contra nan, no ta problema basta cu nan clientenan y nan famianan no ta wordo perhudica.
