ORANJESTAD – E ultimo desaroyonan cu ta tumando luga rond di e refineria, caminda e General License 7a pa continua cu e fase dos no a start ainda, a haci cu sindicato FTA a pidi pa mediador di gobierno convoca y coordina un reunion cu gerencia di Citgo y su abogadonan. Esaki pa motibo di e situacion delicado den e refineria, cu cada dia ta bira mas dificil.

Sinembargo, e reunion cu tabata programa pa diamars ultimo, di parti di Citgo a bin un peticion pa pospone e reunion pa algun dia. Eventualmente e ta tuma luga awe of dialuna awor na departamento di mediador di gobierno. E trahado di staf hunto cu nan sindicato ta preocupa, y nan kier yega na un documento den cual nan ta percura pa Citgo Aruba firma e documento aki cu algun puntonan specifico. E ta un preocupacion valido di e trahadonan, segun mediador di gobierno. P’esey nan kier sinta na mesa y evalua tur e situacion cu por bay pasa cu e trahadonan, specialmente pa nan cupo di trabou.

Trahadonan preocupa

Algun di e trahadonan permanente aki ta afilia na FTA y otronan na IOWUA, tin basta aña na servicio di e refineria. Tin trahadonan cu ora Valero a cera un pakete di pago na e trahadonan, tin un grupo basta grandi di trahadonan cu a sigui over. Nan a continua cu nan aña di servicio cerca Citgo, particularmente e trahadonan cu ta encarga cu e parti di e terminal y e tankinan di deposito di combustibel. Nan ta trahadonan cu tin entre 20 pa 28 aña di servicio den e refineria.

Un punto tin di haber cu si Citgo, den e situacion cu ta pasando aden, con nan por garantisa e salario di tur esunnan cu ta den servicio ainda. Nos ta papiando di como 80 trahadonan, cu cada dia nan ta sinti nan trabou menasa. Nan ta trahado directo y permanente, caminda Citgo tin responsabilidad laboral directo cu nan. E compania sin mas no por bisa e trahadonan aki pa keda cas, y menos sin paga nan salario. E lo bira un violacion di nan derecho hinca den ley laboral di nos pais.

Documento

Mediador di gobierno ta considera e situacion aki uno dificil. Pero e ta percura hunto cu FTA y Citgo lo purba di hinca un documento den otro, pa duna cierto garantia na e trahadonan. Considerando cu nos a drenta caba na luna di april, por lo menos si Citgo por garantisa salario di tur hende cu t’ey ainda. Esaki ta un aspecto importante –segun Pontilius- ya cu salario di trahado ta e recurso economico cu bo tin pa cumpli cu bo compromiso permanentemente. P’esey esaki ta un di e puntonan cu sigur ta wordo hinca den e documento aki.

Otro punto importante tin di haber si Citgo ta dicidi cu tin cu ta reduci e cantidad di personal mas ainda. Esaki mirando cu no tin fondonan, y tambe cu e proyecto grandi di rehabilitacion no ta continua. E trahadonan di staf a duna indicacion na mediador di gobierno cu si e situacion ta continua manera e ta bayendo, esaki ta nifica cu Citgo lo sigui reduci mas trahado di locual ya nan a manda cas caba.

Pontilius a señala cu e dunado di trabou lo por yega na un areglo financiero mutuo. Of nan tin cu cana riba caminda legal, sea via departamento di labor, of e ta bay corte pa termina relacion di trabou. Mediador di gobierno a declara na Bon Dia Aruba cu den tur dos caso ta nifica cu e compania mester tin placa pa paga pa e trahadonan nan añanan di servicio. E ta un parti masha sensitivo cu ta dificil pa trat’e, pero e ta un realidad cu nan no por descarta pa bin riba mesa tambe, segun Pontilius.

Eventualmente, e punto principal pa FTA ta con nan por mantene mas cupo di trabou cu ta posibel. Y si den esey tin algun forma pa yega na acuerdo pa garantisa mas cupo di trabou posibel. Esaki pendiente cu e situacion por mehora, mirando e promesa cu gobierno a haci den cuadro di e lantamento parcial di e sancion, cu nan a bay negosha cu autoridad Mericano y cu a trece cune e General License 7a. Sinembargo, e trahadonan no ta mucho speransa cu esaki lo ta e caso pa continua cu e fase dos di rehabilitacion di e refineria. Principalmente awor cu a wordo revela cu e negociacion entre gobierno di Aruba, Refineria di Aruba (RdA) y PDV Holding no a duna resultado positivo.