Diahuebs ultimo ariba su cuenta oficial di Facebook, Minister di Transporte, Integridad, Naturalesa y Asuntonan di Adulto Mayor, Ursell Arends, a publica cu finalmente e trahadonan di Serlimar a ricibi nan bevordering mas nan ahuste salarial periodiek.
Manera ta conoci dia 8 di mei 2020 Raad van Toezicht y Gerencia di Serlimar a pidi ‘surseance van betaling ‘pa evita cu e compania mester declara bancarota. Dia 19 di mei di e mesun aña Corte a aproba un surseance temporario.
Despues di algun aña dia 28 di augustus 2023, Minister Arends a anuncia durante un conferencia di prensa cu Serlimar a sali for di surseance van betaling. Esaki ta nifica cu e compania por cuminsa tuma decisionnan ariba su mes y ta mustra un bon señal di ta recuperando.
Despues di e anuncio di Minister Arends, un di e puntonan cu tabatin atencion di e mandatario tabata e situacion di trahadonan cu ainda ta den espera di sea periodiek, bevordering y of combersacionnan di funcionamento.
“Tin trayectorio cu mester encamina y un di nan ta cu nos kier wak e compania den verwerking, y pa bay back den verwerking ta bay rekeri inversionnan. Den esaki nos ta trahando conhuntamente cu Raad van Toezicht y gerencia pa wak con Serlimar ta bay drenta den procesamento di desperdicio. Y e di dos aspecto ta, e trahadonan tambe a sacrifica full e periodo aki conhuntamente cu e compania ora tabatin surseance van betaling,” el a indica durante e conferencia di prensa di dia 28 di augustus.
Despues di algun luna Minnister Arends a reuni cu e trahadonan di e companianan y a informa nan cu nan bevordering mas nan ahuste salarial periodiek a wordo deposita riba nan cuenta di banco.
Den su publicacion e mandatario a splica cu e pago aki ta sucede despues cu den luna di november di aña pasa, el a duna su palabra cu el lo cumpli cu e trahadonan pa loke ta trata e situacion aki.
