Señor Frog’s (1).JPG
– Empleadonan di Señor Frogs ainda ta den incertidumbre pa loke ta nan futuro. Nan kier ta sigur cu nan ta haya e placa cu e compania ainda ta debe nan. 
Durante un entrevista cu Starr Ramos marketing manager di Señor Frog’s  ta informa Bon Dia Aruba cu tin dos version di e storia aki. E version di abogado Lincoln Gomez cu ta defendiendo derechonan di e empleadonan di Señor Frog’s  y e version di abogado Joslyn croes kende ta  representa Daniel Orozco y e compania Job M N.V.. Ramos ta bisa cu empleadonan di Señor Frog’s tin hopi preocupacion pa cu nan pagonan pendiente. Aparentemente ayera tardi abogado Croes a presenta su mes como representante di Daniel Orozco y awemainta a purba di lanta un kortgeding pa lanta e prohibicion pa bula di Orozco pa asina e por bandona Aruba.
Miedo di empleado nan di Señor Frog’s
Sra. Ramos ta informa cu empleado nan di Señor Frog’s Aruba tin miedo cu si Orozco logra pa bandona e isla, y si nan perde nan caso, lo no bay tin garantia cu e empleadonan lo wordo paga.  E ta splica cu e hefenan mas grandi di e compania cu ta doño di e franchise kier paga placa pa asina Orozco por bandona e isla mas lihe posibel. Abogado Croes a mencion cu un pago grandi a wordo haci pe trahadonan di e Señor Frog’s,  pero Ramos ta bisa cu esaki ta solamente pago di un kinsena. Tambe e ta bisa cu si nan no a declara bancarota, ainda nan tin cu keda paga e empleadonan manera ley ta stipula. Den e conferencia di prensa cu a wordo haci pa abogado Croes, el a bisa cu nan nunca no tabata tin intencion di paga e empleadonan. Abogado Gomez mientras tanto a manda un carta pa Croes pidiendo declaracion oficial y firma cu ta garantisa cu Orozco lo paga e empleadonan te cu Señor Frog’s declara bancarota. Croes a laga sa na prensa cu nan a yega na un acuerdo cu e trahadonan, pero esaki no ta e caso, segun Ramos. E ta bisa cu e abogado a declara cu Job M N.V. no ta cay bou di Anderson Group, e corporacion Mexicano cu ta doño di e franchise y esaki no ta asina segun Ramos. E compania lo a bay asina leu te cu a delete e-mail y tur evidencia cu nan lo tabata afilia na e compania na Mexico. Mientras tanto e trahadonan ta preocupa, mirando cu e situacion ta birando mas tenso, y nan kier un solucion mas pronto posibel. Tin di nan cu ta trahando hopi aña cu e franchise aki. Por lo pronto Servicio di Impuesto a pone beslag riba tur cuenta bancario di Daniel Orozco.
 
Reaccion di DPL 
Ramos ta splica cu na aeropuerto, via deparatmento di Imigracion, nan a logra haya contacto cu director di DPL, Franklin Kock cu a setup un reunion. Na SIA trahadornan a haya Kock y Sra. Filomena Geerman, kende ta e persona cu a pone e beslag. Nan tabata tin tur cos regla caba, pa asina por a duna e empleadonan un splicacion di locual ta bay pasa den e dianan siguiente.  E empleadonan ta preocupa pa motibo cu impuesto mester wordo paga prome y despues e empleadonan . 
Reaccion di  representante di DPL na Bon Dia Aruba tabata cu a mustra Daniel Orozco riba e derechonan cu cada trahado tin. Tambe e representante di DPL a bisa cu si lo bay pidi Hues pa laga Señor Frog’s bati bancarota, el a bisa cu e trahadonan mester wordo paga nan salario mientras cu e procedura ey ta andando.