Ayera diabierna, un grupo di trahado di Stichting Algemene Bejaardenzorg Aruba (SABA) hunto cu Magaly Brito, presidente di sindicato Seppa, a entrega un manifiesto na minister encarga cu asuntonan di Adulto Mayor na unda nan a apunta nan preocupacion y desconfiansa den directiva di SABA.

E grupo di trahadonan a yega te Bestuurskantoor hunto cu Magaly Brito, na unda el a indica cu for di algun luna caba nan ta tumando nota di un situacion hopi alarmante, un discusion constante entre SABA y Gobierno di Aruba na unda cada partido ta argumenta nan posicion. El a bisa cu awor nan ta kere cu a yega e momento cu partidonan por sinta na mesa, habri caminda pa dialogo y asina yega na un solucion.

“Trahadonan di SABA ta memey di tur e discusion aki, pasobra na final tin un punto cu ta hopi importante pa nan cu ta e tema di recht trekking. Nan tin hopi tempo exigiendo paga pa esaki y no tin claridad, mientras cu a duna Sr. minister tur tempo y espacio pa por a haci un onderzoek den e fundacion pa wak si en berdad e placa a bay pa SABA of si ta Gobierno ta debe e trahadonan aki ainda,” el a bisa.

Nan tambe a tuma nota di e ministernan anterior cu a señala cu nan a pasa den e problemanan aki, nan no tin claridad y nan ta sostene e pensamento pa tin un solucion pa drecha e asunto aki.

Brito a sigura cu nan tambe ta kere cu na cierto momento cualkier fundacion of cualkier instancia cu ta ricibi placa di pueblo mester por responsabilisa nan mes den un manera corecto y transparente con ta usa e placa y con e ta destina realmente.

Nan ta bisa cu nan ta para reglanan y nan a tuma nota di diferente rapportnan cu segun Brito “ta fastioso” y nan ta kere cu esaki solamente den dialogo por discuti esey di ken tin rason of no.

Den nomber di trahadonan, Brito a haci entrega di e documento na unda el a indica na minister Arends pa tuma nota di dje y duna nan un contesta den corto plaso. Esaki ta e di cinco carta cu nan ta entrega.

Tambe nan a entrega nan peticion na su excelencia Sr. Gobernador di Aruba, debi cu nan ta considera cu ta necesario y asina ey para e discusion cu tin tambe den prensa, unda minister Arends ta responsabel pa maneho y cuido di grandinan, “y nos ta kere cu e maneho aki mester keda tambe como politica di un pais.”

Hunto cu esey nan a entrega un carta na hunta di supervision di SABA den cual nan ta trece pa dilanti e diferente preocupacion di e trahadonan na pia di trabao, mustrando cu no tin confiansa mas tampoco den loke ta haciendo tocante e maneho.

Di e carta aki, el a comenta cu tabata dificil pa entrega na e hunta y na final no a yega mes; pero el a drenta via un persona cu nan no tin conocemento si ta den e management team. “Ta un lastima cu cosnan ta bayendo di e forma aki. Sr. minister por tuma nota cu tin problemanan serio y si ta necesario, tuma medidanan pa salvaguardia cu respet tin pa nos reglanan y pa tur manera con placa di pueblo mester ta atendi, pero pa finalmente cu mañan pais Aruba y nos grandinan ta conta cu un maneho di cuido pa nos grandinan. Esey nan ta merece,” Brito a sigura.

Di su parti, minister Arends a expresa cu e recht trekking tabat’ey for di 2002 na unda esaki a bira un “bay y bini” cu tanto Seppa como hunta di supervision. Segun e minister aki mester para y p’esey nan a conduci na un investigacion pa duna claridad si Gobierno mester paga of si a paga e fondonan aki caba.

“Mi a bisa na varios ocasion caba cu si a resulta cu Gobierno mester paga, nos lo asumi nos responsabilidad pa haci esaki tambe. Desde cu mi a haci e conferencia di prensa, mi a bisa tambe cu mi ta spera cu esaki ta yega na un momento cu discusion publico ta termina y nos lo bay back na mesa. Pakico? pasobra discusion publico y politico cu tin na momentonan aki, ningun partido ta bay sali gana di esaki,” minister Arends a comenta.

Igualmente el a bisa cu ayera den Conseho di Minister e mester a informa tocante un comision cu ta bay atende e asunto aki y yega na un solucion, pa asina por intermedia entre gobierno y SABA y tambe con nan ta bay sigui a largo plaso pa loke ta trata cuido di adultonan mayor.

Dia 15 di juni tin reunion entre abogado di Gobierno y abogado di SABA pa cuminsa dialoga pa wak con ta bay presenta un solucion pa esaki.

“Dentro di poco nos lo ta na mesa cu SABA pa por atende su preocupacionnan tambe, y e manera con ami ta traha y loke a mi ta desea, ta pa tin solucionnan concreto. Y mi a bisa esaki den sala den parlamento, den conferencia di prensa y dilanti hues ora e caso tabata andando, cu na ningun momento e trahadonan y tampoco e adulto mayor cu mester di cuido lo bay ta perhudica. Gobierno lo asumi su responsabilidad, mi ta kere loke boso tin derecho riba dje boso lo haya esaki y nos lo traha pa garantisa esey, esey ta e meta principal.”

Brito di Seppa a solicita na minister Arends tambe pa haci tur lo necesario pa percura cu pais Aruba ta financia e maneho y politica di grandinan na un manera debido. “E maneho y cuido di nos grandinan hamas por ta suheto na recorte simplemente pasobra un pais no tin suficiente placa si of no,” el a expresa.

Tambe, el a trece dilanti cu pa cada biaha tin un lista di espera di un cantidad grandi di adulto cu nan ta espera pa por haya servicio “nos ta pidi minister pa haci tur esfuerso pa e personanan akinan den corto plaso hunto cu nan famia nan por haya un alivio pa cualkier situacion cu nan lo ta presentando y nan por haya acceso na cuido si por, na SABA.”

Un di e tareanan di e comision cu ta bay crea segun minister Arends a sigura, ta pa haya un solucion pa e 170 persona cu ta riba lista di espera pa haya cuido necesario

Te na e momentonan aki, SABA tin 294 y un total di 256 na e 13 cas di cuido y tambe tin e 170 persona aki na cas cu ta wardando e ayudo y e cuido.