Trahadonan di S.A.B.A a tene accion: Nan ta pidi solucion pa e situacion precario prome cu aumenta e capacidad na e casnan di cuido

Dialuna mainta trahadonan di Stichting Algemene Bejaardenzorg Aruba (S.A.B.A) a bay den accion. Trahadonan di tanto Oranjestad como di San Nicolas a pone trabao abao pa expresa nan malcontento y disgusto cu e situacion laboral di e fundacion. Bon Dia Aruba a tuma contacto cu Sra. Magaly Britto di sindicato SEPPA pa elabora mas riba e situacion.

Sra. Britto a splica cu e motibo principal di e accion awe ta e falta di personal na e diferente casnan di cuido. El a remarca cu esaki hunto cu hopi otro limitacion cu tin na e casnan di cuido no S.A.B.A., por ehempel material no adecua of cu no ta funciona optimal.

El a sigui splica cu loke a haci cu situacion a empeora mas ainda ta e hecho cu S.A.B.A. a tuma e posicion di aumenta e capacidad di cama di 200 pa 207 y ta pensa cu gradualmente esaki mester yega na 230. Segun S.A.B.A. e aumento di e capacidad aki lo bay tuma lugar den e simannan binidero.

Sra. Britto a resalta cu pa e trahadornan ya caba e situacion ta duro y aworaki cu ta pensa na di aumenta e cantidad di residente mas ta haci cu e situacion ta bira pio. Trahadonan ta pidi pa drecha e problematica di personal cu tin awo, y segun cu aumenta e capacidad di cambernan, mester pone tambe mas personal disponibel pa atende cu e aumento di residentenan.

Segun el a indica trahadonan ta reclama cu aworaki caba e lista (rooster di trabao) ta uno hopi crap y ta cuestiona pakico no ta soluciona e problema cu tin. El a menciona cu aunke S.A.B.A. ta bisa cu gobierno ta subsidia S.A.B.A. pa tin 230 cama, cual den e ultimo añanan a baha na 200 sin consulta cu gobierno, e realidad di S.A.B.A. tambe ta cu gastonan a aumenta y esaki na su turno a obliga S.A.B.A. tambe pa baha e capacidad.

“Kiermen ta bisa e trahadornan aki cu gobierno ta esun cu ta presionando pa subi e capacidad, pero no ta tene cuenta cu si tin suficiente trahador si of no,” el a subraya.

Pa loke ta trata e accion di ayera mainta, Britto ta enfatisa, e trahadornan kier a halsa nan voz di protesta pa loke ta pasando y kier reclama e condicionnan bao di cual nan tin cu funciona. Di otro banda, el a agrega, nan kier lansa un voz tambe den direccion di gobierno pa resalta cu e presion cu e ta eherciendo pa simplemente subi e capacidad di cama sin tene cuenta cu e situacion precario na pia di trabao no ta corecto y lo no sigui wordo tolera mas pa e trahadonan.

No ta un secreto cu e problematica entre S.A.B.A. y Gobierno di Aruba tin basta tempo caba andando. El a remarca cu e trahadornan ta consciente cu e directora nobo a hereda e situacion y ta comprende su posicion, pero pa e motibo ey mes e trahadonan a pidie pa regla e situacion di falta di personal prome cu sigui cu tur otro plannan cu S.A.B.A. lo por tin.

“Salud y bienestar di trahadornan ta importante y mester wordo poni como prioridad prome cu subi e capacidad di cama. Cu esaki nos kier bisa tambe cu e hecho cu ta cambia director na S.A.B.A no ta cambia e realidad financiero di S.A.B.A., tampoco e realidad di trahadornan di S.A.B.A.,” Britto a enfatisa.

E trahadonan ta preocupa pa motibo cu e situacion precario, falta di personal y di suministro ta afecta e cuido cu nan mester duna na nan clientenan. Apart di esaki, e carga di e trabao cu e trahadonan tin cu wanta ta pisa, locual ta conduci na un aumento di AO entre e trahadonan, locual na su turno ta afecta atrobe e calidad di cuido cu nan tin cu ofrece.

Recientemente gerencia a tuma decision pa cera un parcialmente un unidad di e casi di cuido Mari Stella. Pa motibo di esaki nan a parti e pashentnan di e unidad locual ta pone mas presion riba e trahadonan, cu ya caba tin cu lucha cu e consecuencianan di falta di personal.

E noticia di aumento di cama ta aumenta e presion grandemente y e preocupacion ta crece ainda mas teniendo na cuenta e diferente vacaturanan cu e fundacion tin habri, pero cu no ta logra yena di un manera efectivo.

Pues e trahadonan ta haci yamado na gerencia y gobierno pa solucion e problemanan existente cu ta ya caba ta afecta e calidad di cuido cu ta wordo brinda na adultonan mayor, prome cu pone cu aumenta e capacidad di cama cu lo por trece consecuencianan grave no solamente pa e trahadonan, pero pa e fundacion y casnan di cuido tambe.

Pa hopi aña a existi un diferencia di opinion entre Gobierno di Aruba y directiva di S.A.B.A. Gobierno a menciona den pasado cu nan no tabatin un bista cla riba e situacion financiero di e fundacion y con e fondonan publico ta wordo maneha. Ademas di esaki, tabatin diferencia di opinion pa loke ta e tareanan di e fundacion. E discusion aki a pasa den diferente gabinete sin cu por a yega na un solucion.

Di banda di gobierno minister di Asuntonan di Adulto Mayor, Ursell Arends, a dicidi encarga partidonan externo pa haci un investigacion intensivo y amplio, pa asina yega na resolve e diferencia cu tin entre e partidonan.

Segun minister Arends a informa anteriormente, e rapport ta den un fase avansa y ta spera cu e rapport lo por ta cla entre augustus of september.

Prome cu fin di 2023 Gobierno, Raad y sindicato SEPPA a yega na un areglo cu a haci posibel cu gobierno a pone fondo disponibel pa asina S.A.B.A. por cumpli cu pagonan atrasa na e trahadonan.