Ayera mainta e trahadonan di RBC Bank y Divi Phoenix su departamento di benta ambos representa pa sindicato FTA a bay den accion.

Nan a bay den accion casi pa e mesun motibo. FTA ta defende cierto beneficio cu e trahadonan aki a adkiri caba, y cu nan doñonan di trabou kier kita nan, asina presidente di FTA, Hubert Dirksz ta declara na Bon Dia Aruba.

El a laga sa cu e accion lo continua si ambos parti no ta yega na otro. Te hasta e no ta descarta di bay cerca hues pa defini e situacion aki. Of como ultimo opcion bati e porta di Mediador di Gobierno. FTA ta kere cu si tin bon boluntad nan lo por sali afo. Pero si ta asina leu cu nan ta wak cu ta dificil nan lo evalua e opcionnan anterior.

Trahadonan RBC Bank
E sindicalista ta bisa cu e trahadonan di e banco a dicidi di bay den accion pa dos ora. Esaki despues cu FTA a reuni den varios ocasion cu gerencia y cu e trahadonan tambe. E tin di haber cu un punto cu a wordo discuti durante negociacion entre ambos parti, si e ta keda si of no, y cu ta un beneficio cu e trahadonan tabatin den e contracto colectivo (CAO).

Segun sr. Dirksz e trahadonan di e banco a keda cu e beneficio despues cu nan a firma e CAO na april ultimo. Pero un par di luna despues, gerencia di e banco a yama un reunion pa informa cu e beneficio di e trahadonan ta parti di un producto cu tabata wordo bendi na e clientenan di e banco. Ta trata di un plan di spaar cu interesnan atractivo. Segun FTA, e compania kier elimina e beneficio aki den e CAO, pasobra nan no ta sigui mas cu e producto aki, ya cu e banco no ta produciendo beneficio of ganashi cu ne.

Pero automaticamente e gerencia a dicidi cu esaki lo termina tambe pa nan propio trahadonan. Nan a informa FTA riba e decision aki durante un reunion cu nan a sostene diaranson ultimo. E decision aki a cay den mal tera cerca e trahadonan cu a dicidi di bay den accion ayera mainta for di 8 pa 10or

Pa FTA esaki ta inaceptabel ya cu e beneficio aki ta mara na e CAO. E sindicato ta argumenta cu ta existi un diferencia entre e producto cu banco ta bende na nan clientenan, y e beneficio cu e trahadonan tin mara den nan CAO.

E contracto colectivo ta mara na ley cu bo no por viola. Bo no por saca un beneficio sin mas, lider di FTA a bisa. Aunke gerencia d a informa e sindicato di e decision aki, pero di e mesun manera FTA a informa nan cu e trahadonan no ta bay acepta esaki. Ya cu e beneficio aki ta algo cu e trahadonan tin derecho legal riba dje y nan no ta dispuesto sin mas di entrega e beneficio aki. E sindicato ta haya cu si e banco ta insisti di kita e beneficio aki e accion lo continua.

Declaracion di gerencia RBC Bank
E banco a manda un relato unda ta reacciona riba e accion di ayera unda nan ta bis cu nan ‘ta comprende cu e accion industrial di un grupo di su empleadonan di awe mainta por a causa consecuencia pa algun di nos cliente, y nos ta pidi disculpa pa e inconveniencia’.  

“E accion tabata guia pa Federacion di Trahadornan di Aruba, (FTA), e sindicato cu ta representa algun empleadonan di RBC Aruba. Como parti di e contracto colectivo di trabou acorda cu FTA, e empleadonan tin derecho di drenta den accion. Pa motibo cu e ta trata di un asunto interno y ta concerni nos empleadonan, nos no ta duna mas detaye. Sinembargo, nos por comparti cu nos ta keda asombra di e accionnan di nos empleadonan, guia pa FTA.

RBC ta respeta lei di labor di Aruba y ta keda compromete di traha hunto cu su empleadonan y otro stakeholders pa mantene nan derechonan y sostene nan prosperidad. Nos empleadonan ta para central den tur lo cual nos ta haci. Nos ta sigui trata nan cu dignidad y respet segun cu nos organisacion ta desaroya y duna nos cliente un experiencia distintivo.

RBC ta balora e relacion duradero y bilateral cu nos a desaroya cu FTA, como organisacion cu ta representa nos empleadonan. Nos ta spera pa un oportunidad di reuni cu FTA pa resolve cualkier diferencia di opinion na interes di nos empleadonan.”

Divi Phoenix

Pa loke ta traha e trahadonan di Divi Phoenix su departamento di benta, presidente di FTA ta bisa cu ta trata di eliminacion di beneficio di e trahadonan. E beneficio aki no ta den nan contacto colectivo (CAO), pero si ta para den e reglamentonan di e compania. El a splica cu ta trata di trahadonan di benta di timeshare cu ta un producto caminda e bendedo ta haya un comision.

E sindicalista a bisa cu e trahadonan aki nan salario ta hopi abou pero pa medio di e comision e trahadonan ta haya su entrada. El a splica cu den e condicion ta indica cu e si e trahado ta bende e turista e timeshare pa un periodo mas largo di 2 aña, e por haya mas beneficio of comision. Sinembargo e compania kier cambia e condicion aki. Segun e sindicalista, tecnicamente e cambio aki ta posibel, pero esaki ta un manera pa e compania reduci gasto.

Ambos parti a sinta na mesa caminda e compania a keda di bin un proposicion prome cu 1 di september locual no a tuma luga. Despues di 14 dia e trahadonan di departamento di benta di Divi Phoenix a dicidi di para e trabou pa 1 ora. E sindicato a pidi un reunion cu gerencia pa busca un solucion na e situacion aki.

Bon Dia Aruba ta buscando e comentario di banda di gerencia di e hotel.