ORANJESTAD – Recientemente trahadonan di Orchid Casino, situa na Riu Antia, a eligi sindicato STA pa representa nan. Esaki pa medio di un referendum pidi pa STA, cu a wordo celebra diahuebs dia 14 di maart ultimo.
Mediador di gobierno, Anselmo Pontilius, a declara na Bon Dia Aruba cu e trahadonan aki tabata afilia na FTA, y pa medio di e referendum aki, nan a vota pa STA representa nan sindicalmente. Nan ta preocupa pa e situacion di e casino, y nan scoge STA pa mira si e sindicato aki por atende cu nan situacion.
E cantidad di trahadonan cu por a haci uzo di nan derecho di voto na prome instante tabata 61 . Despues cu e lista a wordo revisa, un total di 59 trahado por a haci uzo di nan derecho di voto. Di nan, un grupo 34 trahado a bay vota, di cual 33 a haci’e na fabor di STA.
E sindicato STA a haya e mayoria –segun ley di referendum- ya cu di e 59 cu por a haci uzo di nan derecho, 33 a vota pa STA, cu ta mas di e mita plus uno. E ta un casino cu 70 trahado, entre nan miembro di gerencia y otro trahadonan.
