Trahadonan di NV ELMAR disgusta ta pidi pa suspende y investiga director Anthony Irausquin

Recientemente trahadonan di ELMAR N.V. a manda un carta habri pa Parlamento, prome minister, minister Glenbert Croes y Utilities Aruba NV, den cual cu trahadonan di e compania estatal a trece dilanti nan malcontento tocante diferente punto di atencion.

“Loke cu e trahadonan den un carta habri a manda pa Parlamento, Minester President, Minister Glenbert Croes y Utilities, na unda cu trahadonan malcontento di NV ELMAR ta entrega un lista di asunto dudoso y cuestionabel den e maneho di compania di distribucion di coriente di NV ELMAR,” presidente di Sindicato ALVAST (Algemene sindicato der Stafleden), sr. Raymond Maduro, a indica.

Maduro a splica cu Sindicato ALVAST, cu ta representa e staff na compania estatal, dia 11 di juli 2022 ya caba a vocifera nan malcontento cu e mal maneho y falta di comunicacion cu e director di ELMAR, Anthony Irausquin, na Utilities Aruba, cerca sr. Anthony Rojer.

E presidente di ALVAST a remarca cu dos aña a pasa caba y e maneho no a drecha. El a resalta cu no tin comunicacion ni respet pa e sindicato, ta haci y deshaci y cu e director ta “anti trahado y anti sindical, no ta sinta cu sindicato”.

“Tin masha problema na compania cu mester di atencion, enbes cu e busca un manera pa soluciona e problema, nan ta biaha cada rato y laga e manager y e HR handel nan y despues no ta tende nada mas, un maneho desatroso cu mester un investigacion profundo, manera cu e trahadonan malcontento a trece padilanti,” Maduro a indica.

Sindicato ALVAST ta urgi minister encarga cu cartera di Energia, Glenbert Croes, pa investiga e director di ELMA, riba e lista di asunto dudoso y cuestionabel den e maneho di compania cu e trahadonan a trece dilanti den e carta habri.

Maduro a remarca cu nan kier un investigacion priva tuma lugar y pa no laga Utilities Aruba haci esaki. Ademas nan ta pidi pa schors e director y kita su badge y acceso na e compania pa asina por busca un compania priva cu no tin ningun vinculo ni relacion cu e director ni Utilities Aruba pa haci e investigacion.

E sindicato ta urgi minister Glenbert Croes pa haci e investigacion inmediatamente y si esey no sucede “lo pone minister Glenbert Croes y Utilities responabel pa tur loke por pasa na e compania ya cu e trahadonan ta masha rabia y disgusta cu maneho di Anthony Irausquin.”

Por ultimo e presidente di ALVAST a resalta cu sindicato lo vigila e proceso di cerca y si no haci un investigacion, tin posiblidad cu e trahadonan lo por pone NV ELMAR plat pasobra nan ta disgusta y rabia.