Te ainda trahadonan di Multidisciplinaire Centrum (MDC) ta preocupa, ya cu for di entrega di nan ultimo manifiesto na juni, ainda no tin solucion duradero di banda di Prome Minister, Evelyn Wever-Croes.
Pa sindicato SEPPA, e Minister di Enseñansa ta keda causa problema y cada biaha ta keda sconde tras di cu “hende ta compronde robes”. Ultimo biaha hasta a defende su mes, cu ponencianan sin pia ni cabes –segun e sindicato- riba e carta cu e saca ultimo, cu a cay manera un bom den cara di e docentenan. Pa MDC ainda no tin solucion, cu no ta e idea atrobe ‘mal bruha’ di e minister.
Diabierna ultimo, despues di a reuni cu Minister President un siman prome, trahadonan di MDC ainda a keda pendiente pa un contesta. Trahadonan di MDC no kier tende un contesta di Minister Lampe, sino di e Minister President, kende a mustra di ta compronde e problematica. SEPPA a compronde cu hasta DRH a duna un conseho na Minister President, pues trahadonan di MDC ta keda insisti pa un solucion duradero di e mandatario cu ta na cabes di un gobernacion.
Pero ta parce pa SEPPA cu akinan tambe e minister kier keda cu MDC, keda cu un dienst cu e no ta kere den dje! Pero nan ta haya con sigui traha bao di un Minister di Enseñansa cu lo unico cu el a haci te awor ta kibra MDC. P’esey mes a bisa e Minister President cu e minister actual di Enseñansa te aworaki nan no a haci net net nada pa drecha e limitacionnan di MDC, al contrario. E ora pakico toch e kier keda cu MDC?
