Huridicamente laboratorio nacional a stop di existi. Dialuna ultimo a wordo firma varios documento cu ta facilita e traspaso di e laboratorio di gobierno den su statuut nobo como un fundacion bou guia di hospital, cu por cierto tambe ta un fundacion. Entrante 1 di januari venidero laboratorio di gobierno ta bay over den e fundacion nobo aki.
E nomber di e laboratorio ta uno nobo. Pero segun minister di Salubridad Publico, Dr. Alex Schwengle importante no ta e nomber sino importancia di e cambio aki. Despues cu un siman pasa a wordo firma e social plan entre SEPPA representando empleadonan di laboratorio nacional, gobierno y gerencia di Hospital, e mandatario a laga sa cu e ta kere cu e deal “ta un bon deal” pa tur parti envolvi , tanto pa e trahadonan como pa e fundacion nobo.
Trahadonan
El a indica cu e trahadonan lo haya 12 luna di tempo pa loke ta trata cu nan situacion di empleado publico (ambtenaar). Esaki ta e tempo pa nan evalua si nan ta bay keda den e fundacion of si nan ta prefera di keda traha como empleado publico. Pero esaki ta un decision cu e mesun empleado mester tuma. E mandatario a bisa cu e ta hopi confia cu e trabou den e fundacion lo ta bon, y cu mayoria di ambtenaar na servicio di laboratorio nacional lo kies pa sigui nan carera den e laboratorio nobo bou e capa di un fundacion. E mandatario a indica cu e traspaso aki no ta nifica cu e trabou ta cla. E mandatario a declara cu ainda den transcurso di otro aña, nan mester traha e decreto nacional cu ta necesario pa asina tur e parti fisico di e laboratorio di gobierno por bay over tambe den e manera corecto.
Esaki tambe ta rekeri su tempo –segun minister Schwengle – y durante otro aña nan lo sigui traha pa drecha e aspecto aki.
