E referendum ta un derecho laboral cu e trahadonan por haci uzo di dje pa organisa nan mes, caminda nan ta eligi nan representacion sindical dilanti nan dunado di trabou.

Apesar cu nos ta bibando tempo moderno, no tur trahado na Aruba ta organisa. Ta e caso di e trahadonan di Kong Hing Supermarket cu nan a haya nan mes cu e sorpresa cu e negoshi a bati bancarota y nan trahadonan no tin sindicato pa representa nan actualmente.

Anselmo Pontilius kende ta ex sindicalista y actual Mediador di Gobierno, ta considera importante pa e trahadonan ta organisa sindicalmente. E ta haya cu e caso di e trahadonan di e supermercado menciona ta un di e ehempel nan. E echo cu e trahadonan por ta organisa -segun Pontilius- ta hopi importante pa tur dos partido por atende cu cualkier situacion.

Esaki no ta exclui cu por surgi tipo di problema, manera esun cu a surgi cu e trahadonan di Kong Hing Supermarket, caminda tin empresa cu ta cay den un problema financiero serio. Aunke e no ta conoce detaye di e situacion cu a surgi den e supermercado menciona, pero si e trahadonan cu tin hopi aña di servicio ta esun cu ta sufri e consecuencianan di esaki.

El a bisa cu apesar cu e trahadonan no ta miembro di un sindicato, semper nan por bay na departamento di Labor, ya cu nos ley ta protege e trahadonan. Tin un proceso den cual ta tuma luga pa atende cu un situacion asina. Incluso pa e trahadonan cu tin un entrada mas abou, nan tin derecho ariba abogado liber. Pero tin biaha ora cu nan ta yega pa e asistencia, ya e problema a bira asina grandi caba.

Mientras cu si nan tabata organisa posiblemente nan lo por a atende e problema di otro forma. Y tambe esey lo por a duna e trahadonan un perspectiva diferente. “Pa e trahadonan logicamente den e caso aki, manera tur trahado, ta un problema grandi pa motibo cu tin di nan cu hopi aña di servicio, y unda nan ta bay cuminsa traha…” el a bisa.

E ta haya cu un situacion similar ta pasando cu e trahadonan di Citgo Aruba, caminda e compania aki a bisa cu di e total di 73 trahadonan, nan ta ofrece un suma di placa pa nan bay. E diferencia ta cu e dos sindicatonan cu ta representa e trahadonan a reacciona. Te hasta nan a percura pa pidi Mediador di Gobierno pa trece e diferente partidonan na mesa.

Por lo menos tin un proceso cu tin un debate habri pa atende cu nan situacion. Pero cada caso ta diferente y sigur e ta compronde cu esun di Hong King Supermarket ta un problema cu ta biniendo di basta largo caba. Pero si e trahadonan tabata organisa pa e suma cu ta paga mensualmente di contribucion, si ta su mes tin cu paga abogado, ta un problema hopi serio pa nan, ya cu e ta un servicio costoso.

Si nan tabata organisa seguramente nan lo por a gosa di e beneficionan di un contracto colectivo (CAO) cu tin condicionnan di trabou aregla den dje.