Ayera den oranan di mainta trahadonan di un joyeria den area di waf di Oranjestad a tene un accion di protesta, caminda nan a demostra nan malcontento cu e situacion di trabao cu nan tin actualmente. Presidente di sindicato Federacion di Trahadonan di Aruba (FTA), Hose Figaroa, tabata presente y a elabora mas ariba e situacion y motibo di e protesta aki.

Figaroa a splica na diferente medionan di comunicacion local cu algun dia pasa FTA a gana un referendum pa representa e trahadonan di e joyeria. Normalmente en casonan asina esey ta e final di e discusion si e trahadonan tin representacion si of no. Mediador di gobierno of e intancia legalmente apunta a determina cu esey ta e caso, cu trahadonan tin mayoria y pues e doño di trabao mester respeta e sindicato.

Lamentablemente den e caso particular aki, Figaroa a remarca, nan a keda sorprendi cu na luga di un empresa responsabel sinta na mesa cu sindicato y cuminsa atende cu e problemanan cu a hiba na e situacion aki, e empresa a dicidi di cuminsa pone presion riba trahadonan, intimida trahadonan y cuminsa informa cu nan mester retira hende for di trabao.

Algo cu riba su mes ta sorprendente, el subraya, pasobra durante henter e pandemia di COVID-19 e empresa no a retira ningun hende for di trabao. Al contrario a bisa e trahadonan cu si nan acepta un reduccion den salario nan lo garantisa nan cupo di trabao.

Segun Figaroa a indica, diamars e empleadonan a ricibi carta indicando cu supuestamente pa motibo di e schedule di cruceronan, coincidentalmente net despues cu sindicato ta gana referendum, aworaki nan mester kita hende for di trabao pasobra no tin suficiente negoshi.

“Un argumento mas ridiculo nos no por a scucha, sigur mirando e hecho, y nos tur a scucha kico ta e cifranan di ATA di con e recuperacion turistico di Aruba ta, anto bo ta bin bisa mi cu aworaki cu nos ta recuperando, aworaki diripiente tin necesidad pa retira hende for di trabao”, Figaroa a remarca.

El a enfatisa cu FTA no ta acepta e tipo di situacionnan asina mirando cu e caso aki ta obviamente represalia y intimidacion di trahado pasobra nan a haci uso di un instrument y un derecho constitucional di nan como trahado. “Un empresa como esaki cu no ta solamente estableci na Aruba, pero cu ta estableci internacionalmente mester respeta esaki, mester respeta no solamente e derecho di e trahado, pero mester sa respeta e leynan y constitucion di nos pais Aruba”, el a resalta.

E presidente di e sindicato a subraya cu e intencion di e accion ta pa manda un señal hopi cla na e doñonan di trabao. No solamente akinan local, pero tambe internacionalmente na e otro afiliadonan di e joyeria aki, cu e tipo di trato asina pa cu e trahado no ta wordo acepta na Aruba.

Segun Figaroa a splica, e empresa a manda un persona cu no tin permiso di trabao na Aruba, cu a drenta Aruba como turista, pa bin intimida e trahadonan. E mesun persona aki tambe a bay na departamentonan gubernamental manera Departamento di Labor pa busca informacion con pa kita hende for di trabao. “Esey ta inaceptabel pa nos”, el a expresa.

FTA lo manda un denuncia oficial tambe na Gobierno di Aruba y Minister di Husticia pa pasobra, manera Figaroa a indica, tipo di cosnan asina no por sucede. “No por ta posibel cu hende ta drenta como turista na Aruba y como turista ta bay haci tur e tipo di cosnan aki contra di trahadonan”, el a arega.

Como sindicato cu ta representa e trahadonan, Figaroa a ratifica cu nan ta hopi disgusta, e trahadonan ta hopi disgusta cu e forma di actua di e empresa. El a indica cu nan no a spera esaki y nan a spera un miho actitud for di un empresa internacional manera e joyeria en cuestion. “Nos ta spera cu despues di awe e señal por ta hopi cla tanto pa nan, como pa otro empresanan cu kisas ta pensa cu esaki ta e forma pa trata cu trahado”, el a resalta.

Figaroa a subraya cu e trahadonan aki ta trahando perfecto haciendo nan trabao manera cu semper nan a haci y no tin motibo pa entrega niun keho di mal servicio na Departamento di Labor. E motibo pakico, segun FTA a compronde, e empresa a bay Departamento di Labor ta pa haci pregunta tocante con por retira hende for di trabao.

Locual Figaroa ta enfatisa ta totalmente inaceptable pasobra no tin niun motibo valido na e momentonan aki pa retira niun hende for di trabao cu no ta e hecho cu e trahadonan a haci uso di nan derecho constitucional di uni na un sindicato y pidi e sindicato pa drecha nan condicion di trabao den un contrato colectivo di trabao.

“E ta obvio cu loke nan ta haciendo aworaki ta un excuus pa castiga trahadonan pasobra e trahadonan aki a haci uso di nan derecho constitucional di wordo defendi door di un sindicato. E no por ta mas cla. E cos aki ta puramente represalia. P’esey mi ta bisa e hecho cu nan ta tuma e actitud aki ta bisa hopi di e empresa pasobra un empresa cu ta honesto, un empresa cu ta transparente no por tin miedo nunca cu un sindicato ta bin pa defende e trahadonan. Pero na momento cu tin cos di sconde, na momento cu obviamente e trato no ta bon, na e momento ey como empresa bo tin miedo di un sindicato y esey ta locual ta sucediendo na [e joyeria]”, Figaroa a remarca.

Figaroa a menciona cu e sindicato a informa mediador di gobierno e dia anterior ariba e accion di protesta cu lo tuma luga y a pidi su intervencion den e situacion aki tambe. Aworaki nan lo ta en espera di e siguiente desaroyonan pa cu e situacion di e trahadonan di e joyeria aki.