Ayera mainta prome minister Evelyn Wever-Croes den un conferencia di prensa a sigura cu a logra yega na un areglo pa trahadonan di fundacionnan cu ta haya subsidio for di gobierno tambe haya indexering, aunke nan no ta empleadonan publico, for di aña 2016 a implementa un sistema diferente pa fundacionnan na unda gobierno no tin control riba aspecto di salario di e trahadonan aki.

Manera ta conoci, gobierno a yega na un acuerdo pa por paga indexering na empleadonan publico na luna di april ultimo pero ainda tabata falta e trahadonan di fundacionnan cu ta haya subsidio di gobierno y pa esaki, Sindicato di Empleadonan Publico y Priva di Aruba (SEPPA) na mei ultimo a duna di conoce e lucha cu nan tabatin pa ahustacion di salario di e trahadonan di fundacionnan.

SEPPA a acerca gobierno riba e tema aki y tambe a dirigi un carta na ministernan encarga pa asina yega na un solucion cu “trahadonan di tur otro fundacion ta eherce tareanan esencial, importante y bunita, semper nan salario ta basa den mesun forma cu sector publico, semper a haya derecho riba ahustacion.”

Na 2016, e gobierno di e tempo ey a presenta un sistema e cual ta kibra e parti cu ora gobierno ta duna indexering na su trahadonan, e ta conta tambe automaticamente pa fundacionnan y fundacionnan mes ta encarga cu nan parti di salario y no gobierno, manera prome minister a splica.

“E posicion di un empleado publico y e posicion di un persona cu ta traha na un fundacion ta diferente, pero ya caba tin fundacionnan cu a duna indexering den gobierno di 2017 y den gobierno nos no a haci esey desde 2018,” el a bisa.

Como excepcion pa e aña aki, teniendo na cuenta estado financiero di gobierno caminda por duna na fundacionnan algo adicional pa por paga indexering na trahadonan a presenta e sistema aki na unda tin disponibel 2.8 miyon florin for di presupuesto complementario cu e nota di cambio caminda e fundacionnan mester haci aplicacion pa bin na remarke y e placa ta bay na trahadonan.

E fundacionnan ya caba ta hayando un carta for di e minister encarga y nan mester aplica cu e calculacion di cuanto tin mester cu e condicion cu e placa ta dirigi na e trahadonan.

Pa prome minister, cada fundacion tin e deber di percura pa tin fondonan disponibel pa por paga nan trahadonan, pa casonan den futuro, e ta keda na e fundacion pa pidi e placa aki.

Prome minister a señala cu si e presupuesto complementario cu ta bay ser trata otro siman na Parlamento di Aruba lo ser aproba, ya caba tin agrega e gastonan di pago di e indexering di empleadonan publico, empleadonan den enseñansa, empleadonan di fundacionnan, aumento di reparatie toeslag di pensionadonan, pa esnan cu ta traha priva y ta gana menos cu 2.500 florin y aumento pa gehandicapten uitkering e cual lo cuminsa paga entrante juli 2024.

Di loke ta trata indexering pa empleadonan publico, nan lo haya 11.7% di e perdida di forsa di compra den nan salarionan pa periodo di 2018 te cu 2023 e cual ta bay ser paga di e siguiente manera:

1) Entrante 1 di Juli 2024 ta aumenta salario di empleadonan publico y gelijkgestelden cu 6%.

2) Entrante 1 di Januari 2025 ta aumenta salario di empleadonan publico y gelijkgestelden cu

5.7%

3) E primanan lo keda na 6,387 florin anualmente.

Pa loke ta trata cifranan cardinal di aña 2024, minister di Finanzas, Xiomara Maduro na final di mei ultimo a comparti e cifranan pa aña presupuestario 2024 na unda entrada di Pais Aruba ta wordo premira na 1760 miyon florin y e gastonan ta calcula na 1685 miyon florin. Di esaki, e gastonan di interes ta na 323 miyon florin y e gastonan di personal ta na 484 miyon florin, cual ta keda manteni bou di e norma di 10% di GDP.

E mandatario a sigui splica cu e surplus pa aña 2024 ta ser calcula na 1,1%, cual ta ekivalente na 75 miyon florin. Nos debe nacional, ta 5545 miyon florin, cu ta ekivalente na 79% di nos GDP. Inflacion ta na 3,5%, cual a baha compara cu un 5.5% den pasado.

Igualmente el a repasa algun cambio cu ta resalta den e Nota di Comienso di Aña 2024 unda a splica cu e entrada di Pais Aruba ta wordo adapta na 3% di crecemento economico, y cu e extra entrada aki lo keda destina pa realisa proyectonan manera, entre otro, Delta Plan Ouderen, trabounan na Parke Curason, Palo Marga, Stadion Guillermo Prospero Trinidad, Leerorkest, Loket Plan di Mayor, indexering pa empleado publico, y pa renobacion di Cas di Cultura. Den e Nota di Comienso di Aña 2024 tambe ta integra e fondonan cu Hulanda ta haci disponibel pa cubri e gastonan pa realisa algun proyecto di. Landspakket. Ta importante pa menciona cu e cambionan proponi, no lo afecta e surplus di 1% GDP.

Den luna di januari caba, reaccionando ariba e reportahe financiero di e segundo trimester di aña 2023, CAft a critica e maneho di gasto di personal di gobierno, 32% di e total di gasto, unda por a constata cu pago di overtime a bolbe aumenta. E riesgo ta segun CAft cu lo no cumpli cu e norma pa gasto di personal si no tin accion specifico pa esaki. CAft ta recomenda pa tuma medida structural pa baha gasto di personal.