E echo cu Excelsior Casino ta bati bancarota ta manifesta su mes un crisis cu ta andando pa basta tempo den e sector aki prome cu e coronavirus/Covid-19. Pero cu a bira mas critico cu e presencia di e virus aki na Aruba.

Presidente di FTA, Hubert Dirksz ta kere cu loke a bira un problema ta e echo cu awendia e mundo di casino ta uno cuestionabel. Otro factor tin di haci cu nan no ta pone fondo disponibel pa cubri cualkier problema na momento di cualkier tipo di crisis.

Tambe nos tin un situacion relaciona cu Excelsior Casino, ya cu e trahadonan no tin sindicato cu lo por a defende y yuda nan na tempo. Sindicalista Dirksz ta haya cu tin mas factor relaciona cu e caso aki, ya cu e ta un casino cu ta wordo opera pa un grupo Venezolano E doño mes di e hotel ta esun cu tin e licencia di e casino.

Nan tin un contract cu e grupo di Venezolano pa opera e casino, y pa basta tempo caba nan tabatin discusion riba terminacion di e contract. E situacion actual debi na e crisis di Covid-19 a haci mas facil pa termina e contract. Segun informacion no oficial cu a drenta na FTA ta indica cu e contract a termina entre ambos partido.

Den e mesun momento cu e contract a termina, e compania operador a informa su trahadonan cu nan no tin placa pa cubri su debenan. Tampoco nan no tin modo pa paga salario di e trahadonan, y nan no tabatin mas caminda cu declara e casino bancarota.

No exigencia di fondo.
Lider sindical di FTA ta lamenta cu e echo aki ta pasa debi cu no tabatin cierto exigencia financiero pa e casino aki por opera. E ta haya cu si tabatin cierto exigencia pa e casino aki por a pone un fondo. Of alomenos pone un suma di placa pa un periodo cu por a cubri gasto di salarionan, belasting, etc na Banco Central, awe lo tabata otro historia.

“Awe e situacion lo tabata miho,” el a bisa.

Pues e ta haya cu varios factor a hunga un rol cu ta haci cu e grupo di trahado di e casino aki ta den un situacion dificil. E ta haya cu e tipo di situacion aki nos tin cu premira pa futuro e no ripiti.

El a bisa cu pa basta aña FTA a yega di representa e trahadonan di e casino aki. Nan tabata miembro di FTA y te hasta e sindicato a gana referendum. Pero na momento cu nan a traha un proposicion pa presenta cerca e compania pa cuminsa negosha un contracto colectivo (CAO), e trahadonan mes a dicidi di no continua, y nan mes a stop di paga nan miembresia tambe.

Basicamente FTA no por a continua nan representa e trahadonan di Excelsior Casino. Sinembargo como sindicato FTA ta para tras di e trahadonan, y te hasta nan a yega di duna conseho na e trahadonan di e casino menciona. A pesar cu nan no a sigui cu nan miembresia.