Ayera trahadonan di Departamento di Aduana Aruba a “walkout” pa motibo di e situacion cu nan ta pasando aden pa hopi aña caba, den un edificio cu no ta adecuado pa traha. Tanto director di Departamento di Aduana Aruba, Roderick Croes y presidente di Sindicato di Aduana Aruba (SADA), Edward Maduro, a trece pa dilanti e situacion cu tin e trahadonan hopi malcontento.
Croes a splica cu for di 2015 caba nan a muda den e edificio aki. El a recorda cu e tempo ey tabatin problema cu e edificio bieu, tabatin schimmel, bestia y diferente cos den e luga cu no tabata haciele apto mas pa e trahadonan.
SVB a traha un rapport y esaki a sali malo pa salud di hende y e ora a dicidi di busca un otro luga. Croes a indica cu no tabatin mucho luga adecuado pa nan por a traha y na final nan a muda den e luga actual, cual mester tabata algo temporario, pero ya nan ta bay haci nuebe aña den e edificio aki.
El a sigui splica cu nan a informa caba di e problemanan cu tabatin. Por ehemplo den luna di januari tabatin problema cu e WC, diferente biaha tabatin problema cu e WC, pero den luna di januari el a bay over te cu trahadonan mester a bay cas. Tin problema cu e airconan tambe y aunke tin airco nobo for di dos luna pasa, toch e mesun problema ta keda cu e compressornan ta daña.
“E edificio mes no ta adecuado pa traha. E indeling no ta bon pa traha y nos a bin haya schimmel tambe akiden. P’esey mes nos ta trahando duro pa nos por yega na un solucion pa esaki. E edificio nobo mester a cuminsa caba, pero durante tempo tabatin diferente obstaculonan cu a bin dilanti,” Croes a resalta.
El a remarca cu for di 2021 a bisa minister encarga cu nan mester muda den un otro luga pasobra nan no ta trahando den edificio aki manera mester ta. El a subraya cu e ta malo pa eficiencia y efectividad y aworaki nan a tuma decision pa cuminsa traha riba algo.
Croes a indica cu na caminda varios biaha tabatin diferente punto cu tabata stroba nan di bay dilanti, pero aworaki, segun el a splica, nan ta wak cu tin luz na caminda y el a bisa cu segun el a compronde DOW ta wardando un firma pa nan por aproba, y DWZ ta trahando riba e parti di e contract pa nan por cuminsa traha riba un edificio nobo pa Departamento di Aduana.
“Nos tin cu busca un luga miho pasobra den pasado nos tabatin caba e situacion cu nos a wak hopi edificio pero nan no ta adecuado pa traha. Den tur esunnan no adecuado nos a scoge esaki pa bin aden, menos adecuado, e tabata temporario, pero el a bira ocho, casi nuebe aña cu nos ta aden caba y a yega tempo pa nos bay afo,” el a remarca.
Edward Maduro, presidente di SADA, tambe a subraya cu e situacion cu e edificio a bira “di mas” caba pasobra e mester tabata temporario, supuestamente tres aña pasobra mester a keda cla cu un edificio nobo, pero nuebe aña despues, el a señala, e tereno no a wordo rosa ainda.
“No obstante esey nos tin cu bisa cu loke ta pasando aki ta inaceptable. No por ta asina cu constantemente bo ta haya situacion cu airconan ta daña. Awe un oficina ta calor, mañan otro ta calor, despues di dos siman e otro ta calor. Manera di bisa un wega e ta cua oficina ta calor,” el a splica.
Manera a wordo indica varios biaha caba, el remarca cu e edificio actual no ta un edificio apto mirando cu no tin niun tipo di ventilacion y ora cu airco daña e lugar ta bira calor, benauwd y e por afecta e hendenan cu ta sufri di presion of hende cu ta sufri di un of otro malesa cu por wordo afecta den un situacion dificil.
El a enfatisa cu no ta e problema cu airco solamente, el a enfatisa cu tin un problema cu rioolering tambe. Ya caba den e aña aki, menos di cuater luna, dos biaha trahadonan a wordo manda cas pasobra WC ta bay over, sushi ta sali y e holor ta insoportabel.
“Kiermen e ta algo inhumano, no higienico sigur. E ta inhumano, e no ta na su lugar con e hendenan aki ta wordo trata pasobra ora bo ta un doño di trabao bo tin cu zorg pa bo tin un luga adecuado y mi ta bisa locual ta pasando aworaki sigur ta algo cu nos no ta acepta,” el a subraya.
Maduro a splica cu minister ta na altura y cu varios biaha nan a informa minister ariba e situacion.
El a enfatisa cu mester bin un solucion y no un solucion di pone pleister, pero un solucion cu ta bisa cu e luga no ta adecua mas y cu mester cuminsa busca un caminda pa manda e hendenan di Aduana pa traha.
El a indica cu tin mas departamento di gobierno den e edificio, pero mayoria di nan a sali y a haya otro edificio cu ta mas adecuado. “E no mester ta un luga nobo pero e mester ta un luga adecua, renoba cu bo por conta cu bo ta bay traha tur dia cu no ta bay tin problema cu airco, problema cu rioolering,” el a resalta.
Maduro a menciona cu den e dianan ki awa no ta yobiendo, pero ora awa yobe duro tin un problema grandi pafo di e edificio caminda e awa di rioolering, e nivel di awa di ta subi, nan no por baha for di auto.
“Kiermen ta hopi cosnan cu tin ta pasa y bo ta bisa tiki tiki e hemchi ta yena y awe e hemchi a bay over y hendenan a bisa ta basta, nos tin cu manda un señal bisa cu nos no ta acepta esaki mas y e cos ta cu minister ta na altura di e situacion,” el a agrega.
E edificio en cuestion no ta un edificio di gobierno, e ta un edificio priva y Maduro a bisa cu segun el a compronde e huur di e edificio a subi. El a indica cu si e doño kier aumenta huur y duna e servicio asina, dos opcion tin, of e doño no kier gobierno huur mas of e ta buscando manera di bende gobierno e edificio.
El a subraya cu hopi cos tin cu ta pasando y nan no sa te ki dia e ta caba. El a indica cu aunke e edificio ta priva, ta gobierno mester pone presion pa un solucion.
Maduro a splica cu e ta na su luga pa nan sinta cu e director, a pesar nan sa cu e no ta bay haci mucho, mas pronto posible pa papia di e asunto pasobra esey ta loke pasa den pasado na e oficina principal.
“E hemchi a keda yena te ora cu el a bay over y nos a bisa no por, ta basta. E tempo ey tabatin otro directiva di sindicato, pero mesun situacion pa problemanan. Aworaki ta otro luga pero mesun problemanan atrobe,” el a remarca.
El a expresa cu ta lamentablemente cu cada biaha ta warda te ora sindicato y su miembronan pone presion pa por bin un solucion.
“Esey no ta e manera cu un bon dunador di trabao mester maneha su departamentonan. Abo tin cu haci esey. Si abo ta sinta bon den un oficina nobo cu airco bon, cu bo sa cu e luga ta nobo no tin schimmel, bo no tin problema. Mi ta sigur cu si tin mandatario sinta ki den mi ta sigur cu e cos no ta yega asina leu,” el a enfatisa.
