Algun casino a cuminsa opera caba, despues cu gobierno a duna autorisacion pa nan por habri bek, den cuadro di flexibilisacion gradual di diferente sector pa reactiva nos economia.

Sinembargo tin cierto malcontento cerca e trahadonan di algun casino, ya cu nan ta haya cu no tur casino ta cumpliendo debidamente cu exigencia di gobierno. P’esey nan ta haya bon pa gobierno bin cu cierto inspeccion di sorpresa, pa supervisa di berdaderamente casino ta cumpliendo cu loke nan a stipula riba protocol y orario cu tur casino mester ta cera.

Mas tanto ta e dealernan -cu mester deal cu e clientenan cu ta bay gamble riba mesa- tin nan preocupacion. Nan como dealer no tin distancia di 1.5 meter for di e gambledo. Aunke algun casino a cuminsa pone mesa cu e shield protector, pero nan no ta haya cu esaki ta suficiente pa protege nan di Covid.

Nan ta preocupa debi cu gradualmente pais Aruba a cuminsa habri su frontera. Ya caba nos por ricibi bishita di Canada, Europa y Caribe cu excepcion di Republica Dominicana y Haiti. Ainda ta pendiente si decision lo cay pa habri nos frontera si of no pa e bishitante di Merca, y con esaki lo wordo haci eventualmente dia 10 di juli awor. Nan ta e clientenan potencial di casino. Mericanonan ta gusta gamble, pero ta conoci e situacion cu Merca ta pasando aden pa e cantidad di caso di Covid.

Otro problema tin di haci cu orario di operacion di casino. Gobierno a stipula pa casinonan cera 11or anochi. Kiermen pa 11or anochi tur hende, incluyendo trahadonan, mester ta pafo di casino. Pero tin casino cu kier pone nan trahadonan traha for di 3or atardi te cu 12or anochi. Kiermen un ora mas di loke gobierno a stipula.

Si nan ta cera 11or di anochi pa gobierno no bisa nan nada. Tanten e trahadonan ta keda paden te cu 12or mey anochi pa pone nan laba e fichanan. Nan no ta contra di esey, pero si ta asina, dicon nan no ta cera casino un ora prome di loke gobierno a stipula, pa asina mester haci e trabou cu mester haci, entre nan laba e ficha. Esta prome cu casino cera 11or anochi, cumpliendo cu exigencia di gobierno.

E situacion aki tin trahadonan di cierto casino malcontento. Pero mirando e situacion actual di instabilidad laboral cu nos ta pasando aden den cuadro di e crisis Covid, nan a abstene di bin dilanti pa no pone nan puesto di trabao. Pero si nan ta haya cu abuso ta wordo haci contra nan.