Debi na un fayo tecnico e trahadonan di Aruparking lo bolbe participa na un referendum, si gerencia y hunta di comisario di Arubus no ta reconoce e referendum cu a tene algun siman atras.
Si gerencia di Arubus reconoce sindicato STA pa representa e trahadonan di Aruparking, pues no ta necesario di pasa den un referendum atrobe. Mañan e partinan envolvi a keda di bolbe pa wak cual di e dos opcionnan aki lo wordo aplica.
Situacion referendum Aruparking
Asina e mesun Mediador di Gobierno, Sr. Anselmo Pontilius a reconoce, despues cu el a sostene un reunion cu dirigente sindical di STA y gerencia di Arubus ayera mainta.
Pontilius a bisa cu debi na un fout administrativo, ya cu den e lista di participante a participa un trahado cu tabata den su 60 dia di prueba. Esey tabata e diferencia tambe den e resultado di e referendum caminda di e 21 participantenan, un total di 11 trahado a vota na fabor di un representacion sindical, cu ta net e mita plus un di esunnan cu a bay vota. Pero debi cu un trahado tabata den periodo di prueba ainda, pues akinan e diferencia entre STA y gerencia di Arubus a surgi.
Mediador di Gobierno a splica na Bon Dia Aruba cu logico e eror aki a conduci cu entre gerencia di Arubus y STA berdaderamente a start un discusion encuanto si e sindicato tin mayoria si of no. Encuanto e cuestionamento cu STA a yega di aplica den direccion di oficina di Mediador di Gobierno riba e desaroyo di e referendum aki, Pontilius a bisa cu e “derecho di cuestiona semper t’ey”.
Pero cualkier persona cu ta sinta den stoel di Mediador di Gobierno mester traha cu ley y no por otro, el a bisa. El a laga sa cu e partidonan tambe a yega di haya e lista di e votadonan y niun di e dos partidonan tampoco a ripara e eror cu a wordo cometi. No mester lubida cu den e proceso aki tambe a wordo exclui un cantidad di trahado cu tambe ta riba nan periodo di prueba.
Pontilius a indica cu logicamente e eror aki cu ta uno humano mester wordo coregi y su oficina a informa mesora cu e resultado no por wordo aplica. “Den e caso aki a wordo clarifica mesora cu no tabata deliberadamente sino cu tabata un eror administrativo y cu a wordo reconoce tambe”, segun Pontilius.
Consecuentemente den un situacion asina normalmente Mediador di Gobierno mester convoca un referendum di nobo, y esey a wordo informa na e partidonan tambe verbalmente ayera, segun Pontilius.
Sinembargo el a laga sa cu den e mesun reunion aki e participantenan a confirma cu tin dos opcion: E prome ta cu Mediador ta convoca un referendum na termino cortico cu bendicion di tur dos partido. “E eror ey no por keda asina. E ta stroba e derecho di e trahadonan cu a scoge pa un representacion y compania tambe ta di acuerdo cu mester coregi e situacion”, segun Pontilius.
Pero den principio e compania Arubus ta kere cu e situacion cu a surgi lo por haya un solucion amicalmente. Pero considerando cu Mediador di Gobierno mester trata cu ley, ademas di e opcion anterior tin otro opcion tambe.
E di dos opcion tin di haber cu considerando cu e trahado cu a participa den e referendum su periodo di prueba a pasa, y actualmente e ta un trahado di Aruparking, Arubus lo por reconoce eventualmente sindicato STA. E ta un formula cu ya caba oficina di Mediador di Gobierno a yega di aplica den varios compania y cu varios sindicato.
E ta consisti cu ambos parti ta comproba cu pruebanan concreto e lista di e trahadonan afilia na sindicato y di e compania, y ta reconoce otro, y na final nan ta firma un documento prepara pa Mediador di Gobierno, y tambe firma p’e den presencia di e dos partidonan.
