For di algun tempo caba, trahadonan di Arubus ta mustrando nan mal contento cu varios accion exigiendo un structura salarial nobo y un trato igual. Sinembargo, director di Arubus mes a señala cu no tin espacio pa esey sin inyeccion di Gobierno. Debi na esaki ayera e trahadornan a dicidi di bay te Bestuurskantoor pa entrega un carta na minister di Transporte, Ursell Arends y duna 24 ora pa haya un contesta.

Ayera mainta trahadonan di Arubus hunto cu Magaly Brito di Sindicato di Empleadonan Publico y Priva (SEPPA) a reuni dilanti Bestuurskantoor pa asina entrega un carta na minister encarga cu Transporte, Ursell Arends, ken a señala cu Arubus mester di un reorganisacion.

Magaly Brito di Seppa a indica na minister Arends cu trahadonan di Arubus tin un trayectorio largo pa logra haya un acuerdo y salario husto. Pa nan tambe por sobrevivi den temponan aki cu costo di bida ta pisa hopi den nan cartera y esey ta haci cu e discusion riba e tema di solidaridad ta un cu ta bin ta tardando. “Pa e motibo aki nos a bin cu e peticion na Gobierno, na minister cu ta representa e compania estatal aki, pa asina pone mas fondo necesario y nos por yega na un acuerdo. Por ta un acuerdo cu na e momentonan aki ta calma e situacion y por permiti nan pa sigui brinda e servicio di calidad pero tambe un servicio eficiente,” Brito a splica.

E situacion cu e trahadonan ta pasando ta “imposibel pa sigui labora den un ambiente trankilo, al contrario, tin hopi frustracion y desmotivacion pa e tema aki. Nos sa cu minister a dirigi nos un carta y tambe na mediador indicando cu e tema aki mester ser hiba cu empleador, pero na mesun momento empleador na mesa ta bisa cu si gobierno no pone fondo disponibel ta imposibel pa yega na un acuerdo. P’esey ta mas cu comprendibel cu un biaha mas nos ta akinan. Minister a pone di su parti pa yega na un entendimento y esaki a ser para, pero di otro banda si nos sigui di e forma aki nos lo keda riba caya y nos lo keda den protesta.”

Den e carta a menciona cu nan tin confiansa den e minister cu lo haci tur lo necesario pa den corto plaso nan por yega na un acuerdo. Nan a pidi pa haya un reaccion di minister Arends positivo no mas tarda cu diabierna atardi.

Minister Arends: “Gerencia ta incapaz”

Minister Arends a bisa cu e ta lamenta “cu awe boso mester ta para dilanti di cas di Gobernacion pa manifesta boso disgusto, pero loke si mi por bisa boso como gobernante y di parti di Gobierno, cu ami tambe ta disgusta, pasobra ta politica y gobernantenan a conduci pa Arubus ta unda e ta awe: un compania cu practicamente ta den bancarota. Y no ta Ursell Arends ta bisa esaki, Algemene Rekenkamer y CAft tambe ta bisa esaki, confirmando cu Arubus ta un compania den bancarota. Nos a yega na un momento crucial sea nos ta bay den direccion di cumpli cu exigencianan cu kisas no factibel na e momentonan aki, of nos ta bay traha hunto, Gobierno y trahadonan, pa asina pone e compania para back riba su pia.”

Ademas, el a informa cu ta evidente cu “gerencia ta incapaz”, pa motibo cu a faya su trahadonan y Gobierno di Aruba.

Ayera Raad van Commissaris mester a haya un carta den cual a pidi un reorganisacion completo di e compania cu participacion di e trahadonan ,y di e forma aki nan por cuminsa bay traha pa rescata e compania. Ademas a afirma cu a duna te fin di luna pa presenta un plan structural con ta bay anda cu e fondonan.

Dialuna ultimo minister Arends a ricibi un carta di gerencia di Arubus caminda a solicita un cantidad di placa substancial “pero sin propone un solucion structural y di e forma aki nos no por sigui anda.”

Sinembargo, e solicitud di sindicato ta pa haya un solucion pa salario di trahadonan y pa e peticion cu nan a entrega, e trahadonan mester haya un contesta lo mas pronto posibel pa asina sa kico ta nan proximo paso.

Roque Tromp, ken ta fungi como shop steward di SEPPA, a comenta cu nan como trahadonan no ta sinti cu nan ta hayando e oido cu nan kier haya. “P’esey nos a dicidi di bin y entrega un carta cerca minister Arends cu loke nos ta sinti. Anos keto bay ta sigui pleita, pasobra nos kier un trato husto igual.”

Condicion actual di e busnan ta hopi malo

Pa loke ta trata e situacion di e busnan, Roque a bisa cu “e busnan su condicion ta hopi malo. Tur dia e hefenan mes ta confrontando problemanan pasobra no tin suficiente bus. Aworaki tin 7 of 8 bus para cu no tin piesa pa nan. Otro ehemplo ta un dak di un di e garage na Wayaca cu a bula na comienso di juni, dak di stacion di San Nicolas tambe ta den mal estado y esey ta pa falta di mantencion di Arubus, tin bus ta bin yega Aruba nobo cu no ni a sali core y nan a plunder, kita piesanan for di nan caba y pone na otro busnan pa core. Kiermen cosnan asina ta mal gastamento di placa sin traha cu un plan structural pa yega na solucionnan.”

Nan a informa tambe cu si no lo bin cu un pronto solucion nan ta bay escala nan accionnan den dianan aki.