E clima laboral den Arubus ta birando turbulento atrobe. Te hasta sindicato STA ta premira cu di un rato pa otro e trahadonan ta bay den accion.
E sindicato cu ta representa e trahadonan aki, ta haya cu gerencia di e compania estatal aki no a cumpli cabalmente cu e protocol cu a keda firma. Di otro banda e cantidad di bus den mal estado a aumenta y esun cu a keda para riba caminda tambe. E sindicato no ta mira un cambio pa miho sino pa pio.
Nan ta denuncia cu e busnan ta sigui daña riba caminda. Y cada bes e takelwagen tin cu busca nan pa hinca den e cura di Arubus. “E cura di Arubus na Sabana Blanco no tin luga mas pa pone busnan daña”, presidente di STA, Diego de Cuba ta declara na Bon Dia Aruba. E sindicato ta teme cu e ambiente di malcontento aki lo trece cu ne cu e trahadonan ta bay den accion un ora pa otro.
Un par di luna pasa nan a reuni cu e hunta di comisario di Arubus y nan a trece cerca nan tur e problemanan cu e trahadonan ta pasando aden. Directiva di STA ta desapunta cu e hunta di comisario no a tuma accion y pasonan necesario pa stop cu loke sr. de Cuba ta considera como bagamunderia den Arubus.
E sindicato ta compronde cu ayera e hunta aki a reuni cu gerencia di Arubus, pero te ainda no tin informacion concreto tocante e reunion aki. Pero pa STA ta importante pa nan atende cu e situacion interno den e empresa estatal aki ya cu e lo ta satisfactorio pa e empleadonan.
